COVALIMA, 27 juñu 2019 (TATOLI)–Gabinete Prezidénsia Repúblika (GPR), Tersa (25/6/2019), hahú loke espozisaun ai-han lokál no artezanatu iha kapitál Suai, Munisípiu Covalima, nu’udar parte ida husi atividade vizita Prezidente Repúblika, Francisco Guterres Lú Olo nian iha Munisípiu Covalima.
Prezidente Repúblika, Francisco Guterres Lú Olo, ohin, to’o iha Covalima hodi halo diálogu aberta ho komunidade sira, inklui halo atividade importante seluk Estadu nian to’o loron 29 juñu.
Abertura ba espozisaun ne’e halo husi Diretór Jerál Prezidénsia Repúblika, Domingos Amaral, akompaña mós husi Administradór Munisípiu Covalima, Afonso Nogueira Nahak, ne’ebé eventu ne’e konsentra iha Bairru Santa Rosa.
Diretór Jerál Prezidénsia Repúblika, Domingos Amaral esplika, espozisaun ida ne’e Prezidénsia Repúblika harii mós tenda ba miniatura Palásiu Prezidensiál Nicolau Labato.
Espozisaun ai-han lokál no artezanatu hanesan forma atu valoriza produtu lokál no kriatividade Covalima oan sira hodi dezenvolve sira nia an no sira-nia munisípiu.
GPR ninia partisipasaun hodi harii tenda Prezidénsia Repúblika iha eventu ida ne’e, atu hakbesik Prezidénsia Repúblika ho sidadaun sira liuhusi konseitu Palásiu Aberta, atu fasilita informasaun kona-ba knaar, kompromisu polítiku no inisiativa sira husi Xefe Estadu Lú Olo.
Eventu ida ne’e mós hanesan kontinuasaun hosi “Palásiu Aberta”, ne’ebé hahú dahuluk ho komemorasaun loron-labarik, iha resintu Palásiu Prezidensiál, iha inísiu mandatu Prezidente Lú Olo nian iha tinan 2017.
Kona-ba estrutura no funsionamentu servisu sira iha Prezidénsia Repúblika no espera ho prezensa tenda miniatura Palásiu Prezidensiál bele ajuda públiku hatene di’ak liután serbisu sira iha Palásiu Prezidente.
Iha fatin hanesan, Administradór Munisípiu Covalima, Afonso Nogueira Nahak, hato’o agradesimentu ba inisiativa Prezidénsia Repúblika ne’ebé halo esforsu realiza eventu ida ne’e atu enkoraja liu tan Covalima oan sira.
Eventu ne’ebé sei termina iha loron 28 juñu, partisipa mós husi diretores liña ministerial Munisípiu Covalima, autoridade lokál, estudante no komunidade sira iha Suai Vila.
Jornalista : Eugénio Pereira
Editór : Francisco Simões
