COVALIMA, 28 juñu 2019 (TATOLI) – Espoza Presidente Repúblika, Cidália Nobre Lopez Mouzinho Guterres, ohin, halo vizita ba Prizaun Munisípiu Covalima, hodi fó korajen ba dadur na’in 48 ne’ebé kumpre hela sira nia sentensa iha prizaun laran.
Ho domin boot, Espoza PR Lú Olo ne’e husu ba prizioneiru sira atu halo reflesaun no husu orasaun ba Aman Maromak bele tulun sira sai husi sala hotu ne’ebé sira komete ho neon nakukun bele hakat ba moris ida di’ak iha naroman ho dame.
Cidália dehan, prizaun la’ós fatin ne’ebé nakukun ba dadur hotu nia moris, maibé prizaun nu’udar fatin atu lori ema hadi’a nia vida moris umana, nune’e bainhira remata ona sira nia sentensa iha prizaun bele fila fali moris iha família no sosiedade leet ho atitude ka hahalok di’ak liután
“Ohin ami mai vizita iha ne’e atu fó apoiu morál ba imi, atu hatudu katak imi sei la mesak, ita fahe malu tanba situasaun, maibé loron ruma imi sei fila no hamutuk ho ema sira ne’ebé imi hadomi. Imi iha ne’e bele halo reflesaun ba imi nia moris atu sai di’ak liután,” hateten Cidália ba prizioneiru na’in 48 iha Prizaun Covalima.
Nia dehan, iha Timor-Leste Estadu halo lei ba sidadaun hotu- hotu hanesan, no Estadu mós prodús lei kona-ba pena perpétua ba prizioneiru sira, tanba ne’e bainhira ema ruma halo sala tama komarka, Estadu tau matan nafatin sira nia direitu ba moris.
Cidália husu atu prizioneiru sira labele lakon esperansa, no komarka fatin reinsersaun sosiál muda ema ninia komportamentu umana.
Durante vizita, Cidália rona mós preokupasaun ne’ebé prizioneiru sira iha pisikolozikamente no dala ruma lori sira sai moras hodi hein tempu ne’ebé kleur atu bele livre lalais.
Inan ba nasaun ne’e orgullu tanba iha komarka laran, prizioneiru sira asesu ba tratamentu saúde husi médiku no kada semana hetan vizita husi família hodi fó korajen, morál ba sortimentu ne’ebé sira hasoru iha vida.
Iha fatin hanesan, Diretór Ezekutivu Prizaun Covalima, Júlio Dias Ximenes, hato’o agradese ba vizita espoza Prezidente Repúblika nian hodi rona preokupasaun prizioneiru sira.
Prizaun Covalima harii 2016, sei hasoru mós dezafiu hanesan menus fasilidade ba toba fatin, hena ka tais no manta ba prizioneiru sira la sufisiente, tanba ne’e sira nia parte hato’o ona proposta ba governu hodi prevee orsamentu hodi sosa tan fasilidade hirak ne’e.
Júlio hatutan, agora daudauk Ministériu Justisa mós sei muda tan prizioneiru balun iha Komarka Becora ba Prizaun Covalima.
Durante vizita Gabinete Apoiu Atividade Presidente Repúblika lori mós, roupa, farda, sabaun, ekipamentu desportu hodi entrega ba prizioneiru sira.
Jornalista : Eugénio Pereira
Editór : Francisco Simões
