COVALIMA, 28 juñu 2019 (TATOLI)-Durante vizita iha Munisípiu Covalima, Gabinete Apoiu Atividade Konjuje Prezidente Repúblika (GAAK-PR) uza oportunidade hodi kolabora ho Administrasaun Munisipál Covalima, realiza festival kompetisaun te’in ai-han lokál ne’ebé partisipa husi grupu feto no estudante husi Munisípiu Covalima.
Programa kompetisaun ne’e, partisipa direita husi grupu hamutuk 10 elabora produtu ai-han lokál, hanesan koto, modo mutin, ikan fresku, naan manu Timór, katupa, tukir, akar no produtu no produtu seluk tan, sai hahán ne’ebé kapás no midar .
Iha avaliasaun ekipa juri halo analiza ba hahán tradisionál ne’ebé te’in to’o hola desizaun ba Grupu Sentru Treinamentu Canossa mak hetan primeiru lugár tanba te’in hahán ho kulinária tradisionál Timór, manan na’in ba segundu lugar mak Grupu Wehas no terseiru lugar mak Grupu CBC Salele.
Ho vitória ne’ebé kada grupu hetan, GAAK-PR entrega mós prémiu osan-insentivu ba manán na’in ho valór hosi US$120,00 to’o US$500,00.
Koordenadora no Asesora GAAC-PR, Ivete Oliveira, informa, kompetisaun te’in ai-han lokál realiza nu’udar atividade ida ne’ebé reflete atensaun husi Prezidente Repúblika, Francisco Guterres Lú Olo nian, atu promove ai-han sira ne’ebé povu sira konsumu, nu’udar identidade ida ne’ebé pasa husi jerasaun ba jerasaun.
Ivete hatutan, liuhusi kompetisaun ne’e mós komunidade sira bele hatene oinsá aproveita ai-han sira ne’ebé moris iha sira-nia leet, la’ós de’it atu sustenta moris, maibé bele jere hodi fó benefísiu komersiál.
Iha fatin hanesan, Administradór Munisípiu Covalima, Afonso Nogueira Nahak, agradese no apresia inisiativa GAAK-PR hodi realiza festival ai-han no husu atu komunidade sira bele aproveita hodi promove ai-han orijinál sira hosi Covalima.
Afonso espera, ho atividade ne’e bele kontribui ba dezenvolvimentu turizmu-kulinária iha Covalima nian, nu’udar hahán tradisionál ne’ebé presiza promove nafatin ba nafatin.
Jornalista : Eugénio Pereira
Editór : Francisco Simões
