BOBONARO, 07 desembru 2019 (TATOLI)—Xefe Suku Atu-Aben, Januario Fernandes, ezije ba Governu Timor-Leste liuhusi Ministériu Edukasaun, Juventude no Desportu (MEJD) atu harii Eskola Ensinu Sekundária Jerál (ESG) ida iha Suku Atu-Aben tanba juventude barak mak abandona sira-nia ensinu aprendizajen bainhira ramata ona eskola ensinu báziku terseiru siklu.
Autoridade lokál Suku Atu-Aben, Postu Administrativu Bobonaro, Munisípiu Bobonaro ne’e hatutan iha Suku Atu-Aben iha Eskola Ensinu Báziku maibé difisil mak Eskola Ensinu Sekundária Jerál tanba labarik sira tenke ba eskola iha Postu Administrativu Maliana no Kapitál Dili, ka labarik sira husi suku refere barak mak la hatutan sira-nia estudu.
“Ha’u atu dehan de’it. Ha’u-nia ema sira ho idade produtivu tantu feto ka mane sai ona husi eskola mak barak tanba distánsia ne’ebé dook kuaze han kilometru 20. Bainhira tempu udan, difikulta labarik sira atu asesu ba eskola,” dehan Januário Fernandes ba Ajénsia TATOLI liuhusi entrevista ne’eb’e hala’o iha suku Atu-Aben, sabádu (07/12/2019).
Nia hatutan, haree ba kestaun sira ne’e mak nia rasik ko’alia ona ho estudante sira-nia inan-aman inklui komunidade Suku Atu-Aben, oinsá atu apoiu rai ruma hodi harii Eskola Ensinu Sekundária Jerál ba oan sira. Rai iha ona atu harii eskola, agora oinsá mak atu hetan dalan. Nia husu ba ba Governu liuhusi Ministériu Edukasaun, Juventude no Desportu (MEJD) atu tau konsiderasaun ba asuntu refere.
“Ha’u ezije ba Governu tanba ha’u-nia labarik sira hahú aprende terus husi dalan ba to’o eskola. Enerjia hira mak sira hasai tiha ona. Depois sira tenke sai sedu atu bele toman oras eskola nian. Agora obstakulu boot ida mak situasaun no kondisaun dalan ne’ebé labarik sira liu maibé la garante ba sira-nia moris,” nia dehan.
Ne’eduni, nia esplika, hanesan autoridade lokál sempre tau preokupasaun ba ida ne’e. Tanba, nia infroma, komunidade ka labarik sira ho idade produtivu tenke asesu ba edukasaun tanba dadus provizóriu ne’ebé iha hatudu joven feto no mane na’in 30 resin mak sai ona husi eskola.
Jornalista : Tomé Amado
Editór : Rafy Belo
