DILI, 12 jullu 2019 (TATOLI) – Ospitál Nasionál Guido Valadares (ONGV) simu tan bebé ida, sexu mane hosi sentru saúde Komoro ho isin lolon la kompletu bainhira moris hosi inan ida nian knotak.
“Parese iha kabun laran, semana 25 bainhira forma kakutak no mós ruin kakutak nian la forma diretamente, entaun bebé sai mai ho kakutak ki’ik-oan de’it, ulun laiha, inus labele haree, liman no ain badak no liman fuan no ain-fuan la kompletu”, deskreve Xefe Departamentu Pediatria ONGV, Milena Maria Lay dos Santos, ba jornalista sira iha ONGV, ohin.
Tuir informasaun ne’ebé pediatra ne’e simu, bebé ne’e moris iha uma ho kondisaun tanis no sei dada iis, ajuda hosi ninia avó-feto.
Esforsu ne’ebé médiku sira halo ba bebé ne’e; fó oksijéniu, maibé tanba inus no ibun tomak maka tau de’it iha parte ne’ebé posivel.
“Bebé foin kompleta fulan hitu; katak fulan seidauk to’o atu moris, nune’e matan sorin de’it maka iha, laiha ibun, maibé kondisaun atuál di’ak hela”, afirma doutora ne’e.
Nia dehan kazu hanesan ne’e la’ós akontese beibeik maibé liu tiha tinan rua mak foin mosu fali.
Tanba ne’e nia apela ba inan isin rua sira atu kuidadu aan, tempu bebé iha knotak to’o partu. Atensaun inisia mak bele deteta, nune’e hahú ho tratamentu ne’ebé di’ak liu, antes tarde.
Daudaun ne’e, bebé hamutuk ho ninia-inan halo hela tratamentu, hafoin simu hosi sentru saúde Komoro iha horisehik, tuku 17.00.
Bebé ne’e nu’udar oan dahuluk hosi Marta (la’ós naran loos) ho idade 26.
Jornalista: Antónia Gusmão
Editora: Rita Almeida
