DILI 18 jullu 2019 (TATOLI)-Vise-ministru Dezenvolvimentu Estratéjiku Saúde no Ministru Interinu, Bonifácio Maukoli dos Reis informa katak aimoruk herbal barak mak seidauk rejistu iha Ministériu Saúde (MS) maibé iha farmasia sira ne´e rejistu ona iha MS.
“Aimoruk herbal sira ne’ebé mak seidauk rejistu iha Ministériu Saúde sei akuza ho sansaun, maibé sira ne’ebé seidauk rejistu presiza servisu hamutuk ho ministériu relevante sira para haree ba aimoruk hirak ne’e,” hateten Vise-ministru no Ministru Saúde Interinu, Bonifácio Maukoli dos Reis ba Ajénsia TATOLI iha nia iha knaar fatin Salão das Cinzas, Kaikoli, Dili, kinta (18/07/2019).
Governante ne´e konfirma katak iha lei atu regula aimoruk herbal, tanba aimoruk herbal ne’e, iha MS iha gabinete ida haree asuntu ne´e.
“Ita presiza haree tanba fila fila ha´u hateten katak aimoruk herbal ne’ebé negosiante sira fa’an ne’e tanba atu buka lukru ho maneira sira hanesan ne’e, depois komunidade sira konsumu de´it tanba aimoruk sira ne’e dalaruma iha efeitu no mós la fó efeitu ba ema nia saúde”.
“Tanba ne’e mak presiza lei atu regula para aimoruk sira ne’ebé transporta mai ita bele hatene no mós foin daudauk ami iha Konsellu Diresaun hateten ona katak atu rejistu aimoruk online ne’ebé tama iha nasaun ida ne´e,” haktuir Vise-ministru Dezenvolvimentu Saúde no Ministru Interinu, Bonifácio Maukoli dos Reis.
Nia akresenta, aimoruk sira ne’ebé mai husi Servisu Autonómu Medikamentu no Ekipamentu Saúde (SAMES) no mós aimoruk herbal sira ne’ebé ita hotu akompaña para ita identifika aimoruk sira ne’e, dalaruma tama ilegál no sein kontrola.
“Aimoruk balun tama husi via terrestre, liliu iha fronteira Batugadé no mós aeroportu tanba ne’e mak ita presiza haree ba situasaun hirak ne´e,” konsidera governante ne´e.
Notísia relevante: http://www.tatoli.tl/2019/07/aimoruk-herbal-terapia-alternativu-laos-terapia-prinsipal-husi-mediku/
http://www.tatoli.tl/2018/09/serve-husu-onestidade-individual-faan-ai-moruk-herbal-atu-rejistu/
http://www.tatoli.tl/2019/07/ms-husu-komunidade-labele-konsumu-aimoruk-la-tuir-reseita-medika/
Jornalista: Felicidade Ximenes
Editór : Rafy Belo
