DILI, 18 jullu 2019 (TATOLI) – Oitavu Governu Konstitusionál liuhusi Ministru Ensinu Superiór Siénsia Kultura (MESSK) Longuinhos dos Santos halo ona akordu ho profesór portugés na’in haat no timoroan na´in para apoiu dosente sira iha Institutu Privadu 10 atu bele hetan formasaun língua ofisiál portugés.
“Tinan ida ne’e ita oferese de’it profesór na’in lima atu apoiu institutu 10 ne’e tanba orsamentu limitadu loos. Maibé 2020 ita tau ona prioridade ba intituisaun 10 ne’e sei hetan hotu profesór idaidak,” informa Ministru Longuinhos dos Santos ba jornalista sira iha edifísiu MESSK, Colmera, kinta (18/07/2019).
Ministru Longuinhos dehan maske orsamentu limitadu maibé nia kontinua prevé nafatin osan rihun 75 para apoiu vensimentu ba profesór na´in lima inklui atu sosa fasilidade hanesan disionáriu ba estudante sira ne’ebé mak tuir kursu lian portugés, durasaun kursu semestrál ne’e kada semana oras lima.
“Ita garante kursu ne’e sei hetan aproveitamentu di´ak husi estudante sira tanba ita-nia planu hahú husi 2019 ba to’o 2023 ita bele hetan ona profesór iha Institutu Privadu ne’ebé bele ona lian portugés purvolta 600,” tenik ministru..
Membru governu ne’e iha esperansa katak estudante sira tuir kursu língua portugeza ne´e mesak dosente sira de´it. Sira sei fó tempu tomak atu aproveita tanba benefísiu husi kursu ne’e rasik sei fó vantajen ba dosente sira atu kontinua kapasita fali estudante sira seluk ho kapasidade ne’ebé sira iha.
Enkuantu, reforsa kompeténsia linguístika inklui iha programa Oitavu Governu Konstitusionál pájina 22, nú. 2.17 alinea 15 katak garante uzu efetivu ba língua ofisiál iha ensinu superiór no halo estudu kona-ba kriasaun ba “ano zero”, hodi reforsa kompeténsia linguístika ne’ebé serve hanesan reforsu ida ba koñesimentu sientífiku báziku.
Jornalista : Tomé Amado
Editór : Rafy Belo
