DILI, 24 jullu 2019 (TATOLI)-Ministériu Solidariedade Sosiál no Inkluzaun (MSSI), ohin atualiza dadus ba faze dahuluk kona-ba pagamentu ba ferik no katuas, no invalidés, hatudu porsentu 25 (hosi total na’in 97.000) simu ona pensaun hosi Banku Nasionál Komérsiu Timor-Leste (BNCTL-sigla portugés).
Prezidente Institutu Nasionál Seguransa Sosiál (INSS), Longuinhos Armando, ba TATOLI katak, durante semana ida resin, ekipa pagamentu konsege selu ona benefisiáriu hosi rihun tolu to’o haat ne’ebé hala’o iha munisípiu 11 inklui Rejiaun Administrativa Espesiál Oekusi-Ambenu, no pagamentu iha Dili ho númeru boot kada loron bele atinje rihun ida resin.
“Tuir verifikasaun dadus hosi pagamentu ne’ebé BNCTL hala’o semana ida ona kuaze idózus iha territóriu laran porsentu 25 mak hetan ona pagamentu,” hateten Prezidente INSS, Longuinhos Armando, iha Kaikoli, Dili.
Nia dehan, iha posibilidade prosesu pagamentu sei la’o to’o iha fin fulan-Agostu, tanba BNCTL menus rekursu umanu atu destaka iha territóriu hodi halo pagamentu dala ida de’it.
Mezmu prosesu pagamentu la’o neineik, maibé Longuinhos Armando garante, BNCTL sei hala’o pagamentu ba benefisiáriu hotu, tanba to’o ohin Postu Administrativu balun konklui ona hodi muda ba Postu administrativu sira seluk iha territóriu.
“Tuir akordu ne’ebé INSS ho BNCTL hala’o pagamentu ne’ebé hala’o diferente uitoan ho tinan kotuk, tanba uluk pagamentu to’o de’it iha Postu Administrativu, maibé agora to’o mós iha Suku sira ne’ebé distánsia dook hosi vila,” esplika Longuinhos Armando.
Pagamentu ne’e tuir Lei kada tinan idózus ka invalidés ida sei simu total $380, tanba kada fulan $30 hodi multiplika ba fulan 12.
Jornalista : Nelson de Sousa
Editór : Francisco Simões
