DILI, 26 jullu 2019 (TATOLI)-Prezidente Konsellu Konsultivu Fundu Petrolíferu (KKFP), Padre Júlio Crispim Ximenes Belo, konsidera Timor-Leste no Austrália fahe reseita kampu Greater Sunrise tanba rezultadu hosi polítika negosiasaun ba delimitasaun fronteira marítima ne’ebé asina iha loron 6 marsu 2018 iha sede Organizasaun Nasaun Unida (ONU) iha Nova Iorke.
‘’Ida ne’e rezulta polítika negosiasaun delimitasaun fronteira marítima nian, se ita la-aseita ida ne’e, bele dehan dalan mak re-negósia tratadu ne’e no se ita aseita ida ne’e ita implementa. Bainhira ratifika no implementa, ne’e polítika no estratéjia Estadu ninian, ita tenke simu konsekuénsia no rezultadu hotu hosi tratadu ninian, tanba bainhira tratadu ratifika vale ona,” tenik Padre Júlio ba jornalista sira, iha Universidade Díli (UNDIL), sesta ne’e.
Nia dehan, Timor-Leste tenke aseita klauza sira ne’ebé hakerek ona tuir akordu 6 marsu 2018, tanba buat hotu-hotu esplika ona iha tratadu ne’e no agora hein ratifikasaun ne’e vigora.
‘’Ne’e asuntu Estadu nian, Parlamentu tenke halo debate ida tasak no kle’an. Labele te’in bosok-bosok de’it. Ita haree sira (deputadu) halo debate ne’e lalais de’it no la fó tempu halo análize kle’an kona-ba matéria sira iha tratadu. Prontu, ida ne’e mak ita-nia situasaun reál. Ita simu. Aban bainrua ladi’ak ba mak ita hadi’a,” nia akresenta.
Nia realsa, asuntu fahe persentajen ne’e iha ne’ebé de’it, akordu internasionál sira permiti atu bele fahe ho kompañia no mós Estadu sira.
‘’Tanba buat tratadu ka akordu internasionál ne’e ita aseita ona, sira (Austrália) tenke aseita mak foin bele sai tratadu ida. Se ita ka sira la aseita nunka sai tratadu. Ne’e duni, ita hetan pursentu 70 no sira pursentu 30 ne’e aseitável,” nia dehan tan.
Antes ne’e, Parlamentu Nasionál (PN) aprova ona Proposta Rezolusaun númeru 2/V-Ratifikasaun tratadu entre RDTL ho Austrália, ne’ebé estabelese Respetiva Fronteira Marítima iha Tasi Timor, iha finál globál ho rezultadu votu a-favór 42, kontra 23 no abstensaun 0.
Tuir anexu B kona-ba Rejime Espesiál ba Greater Sunrise, artigu 2 (propriedade no fahe reseita) alíneia dahuluk hateten petróleu ne’ebé produzidu iha kampu Greater Sunrise hanesan propriedade Timor-Leste no Austrália nian.
Alínea daruak, hateten parte sira tenki fahe reseita hosi upstreamka reseita ne’ebé diretamente rezulta hosi esplorasaun upstream hanesan petróliu ne’ebé prodúz iha kampu Greater Sunrise.
Tuir mai, proporsaun pursentu 70 ba Timor-Leste no pursentu 30 ba Austrália bainhira kampu Greater Sunrise dezenvolve iha Timor-Leste no bainhira dezenvolve iha Austrália, pursentu 80 ba Timor-Leste no pursentu 20 ba Austália.
Artigu 5 kona-ba Entidade Regulatória sira ba Greater Sunrise, hateten parte hirak estabelese liuhosi prezente tratadu estrutura regulatória hosi nível rua atu halo regulamentasaun no administrasaun hosi rejime espesiál Greater Sunrise nian, kompostu hosi Autoridade Dezignada ida no Konsellu Supervisaun ida.
Kona-ba Autoridade Dezignada artigu 6 esplika, Autoridade Dezignada sei responsável ba regulasaun no jestaun diária iha atividade petrolífera sira iha área rejime espesiál nian, hafoin lori naran Timor-Leste no Austrália nian, no lori fali ba Konsellu Supervizaun nian.
Artigu hanesan esplika finansiamentu hahú hosi kobra taxa sira tuir akordu ho Kódigu Minerasaun Petrolífera ne’ebé aplikável no kontratu fahe reseita hosi Produsaun Greater Sunrise nian.
Enkuantu, Autoridade Dezignada sei iha podér no funsaun hanesan reguladór no jestór diária hosi Atividade Petrolífera iha Área Rejime Espesiál nian, tuir akordu prezente tratadu no nia funsaun sira.
Konsellu Supervizaun ne’e kompostu hosi ema nai’n rua ne’ebé nomea hosi Timor Leste no Austrália no hanesan reprezentante konsellu supervizaun labele iha kualkér interese finanseiru ka interese komersiál diretu seluk iha operasaun ba rejime espesiál Greater Sunrise nian ne’ebé bele hamosu konflitu interese no representante refere tenke hato’o ho detallu kona-ba sira ninia interese pesoál relasiona ho pozisaun iha Konsellu Supervizaun.
Konsellu Supervizaun iha podér no funsaun atu ezerse supervizaun estratéjika iha rejime espesiál Greater Sunrise nian, hamosu no superviziona rejime ida ne’ebé garante no kontrola verifikasaun ba reseita no regulasaun administrativa iha esplorasaun ba petróleu offshore.
Jornalista: Evaristo Soares Martins
Editór: Xisto Freitas
Notísia Relevante: PN Aprova Rezolusaun Ratifikasaun Tratadu Entre RDTL no Austrália iha Finál Globál
