DILI, 26 Jullu 2019 (TATOLI)-Governu Timor-Leste liuhusi Ministériu Negósiu Estranjeiru no Kooperasaun (MNEK), Diresaun ASEAN (Organizasaun Sudeste Aziátiku-Sigla Inglés) hamutuk ho reprezentante sira husi liña ministeriál dezloka ona ba Jakarta, Indonézia hodi vizita Sekretariadu ASEAN hodi aprende no familiariza aan ho estrutura ASEAN nian.
“Rezultadu vizita ne’e di’ak tebes, ita-nia ekipa konsege familiariza sira-nia aan ho estrutura ASEAN nian, depois halo ligasaun ho pesoál sekretariadu nian atu nune’e aban bainrua iha tempu oin, presiza buat ruma ne’ebé liga ba prosesu adezaun ita nian ba ASEAN, ita hatene tama kontaktu ho se, ne’ebé ita hatene ona, iha ema ne’ebé sei halo kontaktu ho ita regularmente,” hateten Diretór Jerál Asuntu ASEAN, Jorge Trindade Camões ba Ajénsia TATOLI iha nia kna’ar fatin, MNEK, Praia dos Coqueiros, sesta (26/07/2019)
Diretór Jorge Camões informa, ita iha ne’e mós iha ema ne’ebé halo pontu ligasaun ho iha ne’ebá (sekretariadu ASEAN), prosesu di’ak tebetebes.
“Ha’u hanoin momentu ita-nia adezaun ba ASEAN pozitivu tebetebes, iha entuziazmu hosi ASEAN ninian, atu haree kona-ba preparasaun hotu ne’ebé ita halo iha ne’e liuhusi TLAMP (Timor-Leste ASEAN Mobilization Program)-Programa Mobilizasaun Timor-Leste ba ASEAN, elementu ne’ebé ita aprezenta ba sira, sira mós entuziazmu hakarak tebetebes hatene buat hothotu ne’ebé ita hala’o,” reforsa tan diretór ne’e.
“Sira hakarak envolve aan ho ita iha prosesu TLAMP nian liuliu halo Outreach Activity iha Timór, sira hakarak Sekretariadu ASEAN nian mai hamutuk ho ita atu ba iha eskola sira, sosiedade, atu halo sensibilizasaun kona-ba prosesu ASEAN nian,” nia haktuir.
Diretór Jerál Asuntu ASEAN, Jorge Trindade Camões haktuir tan, Sekretariadu ASEAN mós hakarak mobiliza jornalista ASEAN nian mai Timór atu nune’e lori ASEAN hakbesik ba ita, ao mesmo tempu lori ita besik ba ASEAN. “Ita iha ne’ebá ha’u aseita disponibilidade sira nian, ita prontu atu koopera ho sira atu realiza sensibilizasaun ne’ebé sira halo, ita rasik iha ona programa ne’e, sira mai koopera ho ita, ita kontinua hala’o programa ne’ebé iha ona,” nia hateten.
Diretór ne’e informa mós katak bainhira iha Jakarta, hasoru malu ho Deputy Secretary-General of ASEAN for Community and Corporate Affairs, Akp Mochtan, nia aprezenta ideia sira ne’e ho nia ekipa.
“Ami iha enkontru separadu ida, só para trata oinsá sekretáriu jerál ASEAN nian koopera ho ita atu materializa asuntu sensibilizasaun kona ba ASEAN, oinsá mós ita haree halo ligasaun mós ita-nia instituisaun akadémika sira ho sentru de estudu balun ne’ebé ASEAN nia iha, sira iha ligasaun ba malu, ne’ebé ita iha konkordánsia ida koopera atu nune’e iha komunikasaun ne’ebé di’ak”.
Diretór Jerál Asuntu ASEAN, Jorge Trindade Camões dehan, ita iha Timór mós hanoin hela liuliu UNTL (Universidade Nasionál Timor Lorosa’e) atu estabelese sentru estudu ba ASEAN. “Ha’u ko’alia ho sekretariadu jerál ASEAN sira mós prontu atu koopera, fasilita oinsá ita bele halo ligasaun ho instituisaun ne’ebé relevante ho sentru de estudu sira ne’e, sira prontu tebetebes atu koopera tulun ita bainhira ita presiza,” nia haktuir.
Diretór reforsa tan katak liña koordenasaun la’o di’ak tebetebes, ita hatene ona ema se mak iha ne’ebá, iha tempu badak ita mós sei koloka ema hosi Ministériu Negósiu Estranjeiru ba iha ita-nia embaixada iha Jakarta. “Ba Jakarta ita atu servisu direita ho sekretariadu jerál ASEAN nian atu haree prosesu adezaun nian, ne’ebé koordenasaun intensa sei di’ak liután, iha tempu badak nia laran,” nia informa.
Nia mós, iha biban hanesan, Diretór Jerál Asuntu ASEAN informa tan katak tour ASEAN ramata ona ho vizita husi ofisiál ne’ebé kompostu husi liña ministeriál ba Jakarta, Indonézia ne’e. “Envolvimentu komunikasaun ami nian sai hanesan nesesidade atu ekipa ida dezloka ba Jakarta, ha’u hanoin la iha problema dezloka fila fali, mas ami sei haree komunikasaun ne’ebé hahú agora ba oin”.
“Depois enkontru foin daudaun iha Jakarta, ami fó ona programa ba sira, sira sei diskute fila fali atu finaliza hosi parte sira nian, partilla ho ita, depois ita haree fila fali sei iha adicionais balun, ita mós kontinua komunika ho sira to’o iha konkordánsia ikus liu,” konklui diretór ne’e
Notísia relevante: http://www.tatoli.tl/2019/07/18/tl-sei-haruka-delegasaun-ba-jakarta-enkontru-tekniku-ho-sekretariadu-asean/
Jornalista : Nelia Fernandes
Editór : Rafy Belo
