DILI, 27 jullu 2019 (TATOLI)—Ekipa Assalam FC susesu hadau pontu tolu bainhira dere adversáriu AD SLB Laulara ho golu 4-3 iha jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, ohin lororaik.
Golu vitória Assalam prodúz hosi jogadór Franciatma Kefi (21) iha minutu 10, 87, Daniel Adadi (10) iha minutu 58, 60. Enkuantu, golu SLB hatama hosi Mouzinho de Lima (10) iha minutu 6 no Aldo Amaral (15) iha minutu 41 no Bakayoka Ozi (13) iha minutu 86.
Maski lakon ho Assalam, maibé tabela klasifikasaun provizória hatudu SLB kontinua túr iha zona seguru.
Jogu refere dirije hosi árbitru Francisco Pereira, juiz liña Elísio Reis, Eufrásio Lopez no árbitru rezerva Gerónimo dos Santos.
Treinadór Assalam, Andi Susanto hateten nia sente orgullu ho vitória ne’e tanba ninia ekipa hatudu jogu ne’ebé di’ak hodi manán jogu.
“Ha’u kontente ho rezultadu ohin maski ami manán mihis maibé ida ne’e mak jogu. Jogu segunda volta ne’ebé atu mai, ha’u koko hadi’a ami-nia jogu halo di’ak liu-tan,” dehan Andi.
Iha sorin seluk, Vise Prezidente AD SLB, Filomeno Fernandes haklaken jogu sempre iha lakon no manán maibé nia husu ba jogadór sira hotu labele lakon esperansa ho rezultadu ne’ebé iha. “Rezultadu jogu mak nune’e ona. Iha tempu ida joga ami manán maibé ohin tempu ekipa seluk nian. Ami ba oin sei hadi’a di’ak liu-tan atu bele manán jogu tuir mai,” katak Filomeno.
Jornalista: Hortençio Sanchez
Editór: Xisto Freitas
