DILI, 1 agostu 2019 (TATOLI) – Primeiru interrogatóriu ba suspeitu ho inisiál JDC, kazu Leorema, adia ba aban, tuku 9.00 hodi rona desizaun tribunál nian atu aplika medida koasaun termu identidade rezidénsia ou prizaun preventiva.
Notísia Relevante : Suspeitu Kazu Leorema Kumpre Prizaun Preventiva
Tribunal Distritál Dili (TDD), ohin rona tan deklarasaun suspeitu na’in ida ho inisiál JDC ne’ebé mak durante ne’e seidauk detein hosi Polísia Nasionál Timor-Leste (PNTL).
Antes nee, Ministériu Públiku akuza ona suspeitu na’in 10 ho krime omisídiu agravadu ne’ebé mak previstu iha kódigu penal 139 no arma branka ne’ebé mak komete hosi suspeitu sira ho inisiál DAV, JC, TS, AP, MLM, AS, LC, CM, EL ho DC.
Suspeitu na’in 10 ne’e agora kumpre hela medida koasaun prizaun preventiva iha Prizaun Bekora, Dili.
Ministériu Públiku ne’ebé reprezenta hosi Prokuradór Jacinto Babo, halo mós akuzasaun hanesan ba suspeitu JDC ho krime omisídiu gravadu no arma branka.
Iha audiénsia julgamentu ne’e, suspeitu JDC hetan asisténsia legál hosi advogadu privadu Marito da Silva.
Jornalista : Domingos Piedade Freitas
Editór : Francisco Simões
