DILI, 3 agostu 2019 (TATOLI) – Prezidente Repúblika (PR), Francisco Guterres Lú Olo, informa nia parte to’o oras ne’e seidauk simu relatóriu ezekusaun orsamentu jerál Estadu (OJE) 2018 hosi Governu.
“To’o agora ha’u seidauk simu relatóriu ezekusaun orsamentu jerál Estadu 2018 nian,” dehan Xefe Estadu ba jornalista sira, iha Salaun Katedrál, Vila Verde, Dili, sábadu ne’e.
Proposta OJE 2018 hamutuk billiaun $1,279, husi totál ne’e saláriu no vensimentu millaun $200,312, bens no servisu millaun $421,666, transferénsia públika millaun 261,925, kapitál menór millaun $3,659, kapitál dezenvolvimentu millaun $392,037.
PR promulga OJE 2018 iha loron 27 setembru 2018 ho montante billiaun $1,277,4.
Enkuantu iha loron 23 janeiru 2019, PR veta OJE 2019 ho montante billiaun $2,1, ho razaun sustentabilidade finanseiru iha ameasa nia laran no orsamentu la tuir Konstituisaun no Lei estruturante sira, dezikilibru orsamentál ne’ebé aas tebes no laiha polítika alternativa.
Parlamentu Nasionál (PN) halo reapresiasaun ba orsamentu 2019 hafoin vetu husi Xefe Estadu.
Hafoin reapresiasaun OJE 2019, PN hasai montante millaun $650 hosi sosa partisipasaun kompañia ConocoPhillips no Shell, tanba kontempla ona iha Lei Atividade Petrolíferu ne’ebé PR promulga.
Nune’e, iha reapresiasaun ne’e, PN aprova OJE 2019 ho montante billiaun $1,482.
Jornalista: Hortençio Sanchez
Editór: Xisto Freitas
Notísia Relevante:
OJE 2018 Aprovadu Hosi Parlamentu Nasionál
PN Aprova Proposta OJE 2019
PN Aprova Reapresiasaun Proposta OJE 2019
OGE 2019 ezekuta besik remata ona no besik tan ona aprezenta OZE 2020 nian.
Rajaun saida mak relatorio ezekusaun 2018 nian seidauk lori ba PR???