DILI, 4 agostu 2019 (TATOLI)—Avansadu prinsipál Karketu Dili FC, Rofino Walter Gama, susesu marka golu tolu (hatric) iha jogu kontinuasaun Liga Futeból Amadora (LFA) époka 2019 bainhira kontra Boavista FC Timor ne’ebé hala’o iha Estádiu Munisipál Dili, ohin.
Golu tolu ne’ebé Rofino prodúz ida-idak iha minutu ’18, ’32 no ’36. Enkuantu, golu Boavista nian marka hosi António Vega iha minutu 19 no Edit Sávio iha minutu 45.
Maski manán Boavista, maibé Karketu kontinua tuur iha zona dezpromosaun no Boavista túr iha zona seguru.
Ba Agência Tatoli, Rofino dehan, golu tolu ne’ebé nia marka hodi fó vitória ba Karketu oferese ba nia oan ne’ebé semana oin sei halo tinan.
“Ha’u kontente loos bele marka golu tolu. Golu ne’e oferese espesiál ba ha’u-nia oan ne’ebé sei selebra nia aniversáriu semana oin,” dehan Rofino.
Lee mós:
Jogadór Brazíl no Gana Sei Reforsa Karketu iha Jogu Segunda Volta
Haryadi Promete Lori Karketu Ba Vitória
Karketu Hapara Kontratu Jogadór Trio Papua
Impata ho Assalam, Karketu Kontinua iha Zona Dezpromosaun
Académica Hanehan Karketu ho Golu Úniku
Iha fatin hanesan, treinadór Karketu, Haryadi Hengkan sente kontente bainhira nia ekipa susesu hadau pontu tolu hosi ekipa zigante Boavista.
“Ha’u haree jogu ohin ne’e la’o kapa’as loos. Ha’u foin orgullu ho rezultadu ne’e. Ha’u fiar iha jogu segunda volta mai Karketu sei haksoit sai ona hosi zona dezpromosaun,” Haryadi tenik ho otimista.
Nia subliña, maski Karketu hatudu jogu ne’ebé di’ak ona maibé sei presiza nafatin jogadór iha parte klaran no defeza atu reforsa tan ekipa refere.
Iha sorin seluk, asistente treinadór Boavista, Miro Valdo Bento hateten jogu kapa’as ona maibé nia parte la satisfás ho desizaun árbitru ne’ebé labele kontrola jogu refere ho di’ak.
“Jogu ohin kapa’as loos, maibé árbitru mak huu ladún di’ak. Loloos, ohin, ami-nia bola penaltu maibé árbitru la huu, depois bola fila mai Boavista nia área fallansu akontese mós hanesan iha Karketu nia área huu fali hodi fó risku (penaltu) ba Boavista. Ne’e ita haree ladún di’ak,” Miro lamenta.
Miro afirma, bainhira atu hadi’a futeból di’ak liu-tan iha futuru, órgaun LFA no árbitru tenke dirije jogu ho loloos no profisionál.
Jornalista: Hortençio Sanchez
Editór: Xisto Freitas
