DILI, 3 agostu 2019 (TATOLI) – Klube Lalenok United FC susesu sai ona kampiaun provizóriu, hafoin halakon adversáriu Académica FC ho rezultadu golu 5-2, iha jogu ikus primeira volta Liga Futeból Amadora (LFA) époka 2019, ne’ebé hala’o iha Estádiu Minisipál Dili, sábadu ne’e.
Nune’e, ho vitória ne’ebé Lalenok hetan, lori kedan ekipa ne’e lidera provizóriu tabela klasifikasaun iha jogu primeira volta, maski hela Boavista no Karketu ne’ebé sei termina sira nia jogu aban.
Golu ne’ebé Lalenok prodúz mai hosi Fabio Christian iha minutu 18, Italo Pimentel 45, Zacarias Cabral 51, Yohanes Gusmão 60, Hermino de Sousa 85. Enkuantu, golu Académica prodúz hosi Tore Kaba iha minutu 76, 90+3.
Jogadór foun Lalenok ne’ebé transferidu hosi Atlético Ultramar, Fabio Christian (25) sente kontente tanba bele kontribui golu ba nia klube.
“Ohin ha’u sente kontente tanba foin mak muda mai Lalenok maibé iha jogu dahuluk ha’u hatama ona golu ida. Ha’u fiar Lalenok sei avansa nafatin ba oin nune’e bele sai kampiaun iha Liga ida ne’e”, nia dehan tan.
Lee mós:Husik Maibé Saudade
Entretantu, Treinadór Lalenok, Yance Matmei agradese tebes tanba Lalenok kontinua iha pozisaun leten maski klube ne’e foin promovidu.
“Ha’u agradese tebes ba Maromak tanba ohin ami manán tan. Ha’u fiar jogu tuir mai bele sai di’ak liu-tan,” dehan Yance.
Iha sorin seluk, Treinadór Académica, Salvador Gama konfesa katak Lalenok hanesan ekipa ne’ebé mai ho nia jogadór ne’ebé kualidade tanba ne’e mak konsege manán Académica.
Nia dehan, Académica sei presiza tan jogadór iha parte klaran nune’e bele reforsa tan avansadu.
“Ami falta iha klaran, maibé klube hanoin atu sosa tan jogadór parte klaran di’ak ona. Ohin Lalenok manán ne’e sira iha jogadór ne’ebé di’ak duni. Ha’u tenta halo estratéjia nune’e bele halo impata ka manán maibé la konsege”, nia tenik.
Nia subliña, ba oin tenta hadi’a nafatin atu iha jogu segunda volta bele hiit sa’e hikas Académica hosi liña dezpromosaun.
Jogu ne’e dirije hosi árbitru Francisco Pereira, juíz liña António de Carvalho, Gerónimo dos Santos, ho árbitru rezerva mak Artur Belo.
Tabela klasifikasaun provizória lidera hosi Lalenok ho pontu 16, segundu lugár Ponta Leste ho pontu 15, terseiru lugár Boavista ho pontu 11, kuartu lugár Assalam ho pontu 11 (Boavista no Assalam pontu hanesan maibé diferente golu), kintu lugár AD SLB ho pontu 9, sestu lugár Ultramar ho pontu 7, sétimu lugár Académica ho pontu 4 no ikus liu Karketu ho pontu 2.
Jornalista: Hortençio Sancez
Editór: Xisto Freitas
