DILI, 6 agostu 2019 (TATOLI) – Asesór Árbitru Timor-Leste, Vital Saldanha, hateten árbitru hirak ne’ebé durante ne’e dirije ona jogu iha Liga Futeból Amadora (LFA) primeira volta, sei la tuun iha jogu segunda volta hodi dirije jogu.
“Árbitru hirak ne’ebé hú ona iha jogu primeira volta ne’e ami atu halo mudansa uituan. Sira ne’ebé mak durante ne’e la hú ne’e mak sei hú fali iha jogu segunda volta ida ne’e,” dehan Vital liuhosi konferénsia imprensa ne’ebé hala’o iha salaun Xanana Sport Center, Bairro Formosa, Dili, tersa ne’e.
Tuir Vital, mudansa ne’ebé ekipa árbitru halo ne’e atu klube hotu bele haree no halo komparasaun ba árbitru sira-nia kualidade iha kampu ida.
Nia esplika, árbitru hirak ne’ebé sei tuun iha jogu segunda volta la’ós foun maibé balun iha ona jogu primeira volta hanesan juíz liña no árbitru rezerva.
Antes ne’e, ekipa árbitru hetan protesta maka’as hosi klube sira, tanba ne’e mak ekipa hirak ne’e foti desizaun hodi halo mudansa.
Agora dadauk totál árbitru ne’ebé dirije hela jogu LFA hamutuk sanulu resin neen.
Jornalista: Hortençio Sanchez
Editór: Xisto Freitas
