DILI, 06 agostu 2019 (TATOLI)–Primeiru-Ministru, Taur Matan Ruak, orienta Ministra Finansa (MF) interina, Sara Lobo Brites, atu esplika ezekusaun Orsamentu Jerál Estadu (OJE) 2019 ba membru Governu sira, nune’e bele hatán iha Parlamentu Nasionál (PN) bainhira deputadu sira husu kona-ba progresu ezekusaun.
“Antes ita atu tama ba ajenda, ministra ko’alia uitoan kona-ba nivel ezekusaun orsamentu 2019 tanba ita ba iha parlamentu ejijénsia ba ezekusaun orsamentu maka maka’as ” hatete Xefe Governu, Taur Matan Ruak, iha sesaun Debate Envelope Fiskál 2020 iha salaun Ministériu Finansa, Ai-tarak-laran, ohin.
Xefe Governu hodi husu tan ba MF interina atu esplika ba governante sira kona-ba to’o iha ne’ebé ona ezekusaun OJE 2019, atu membru Governu sira prepara-an didi’ak bainhira hatán ba ezijénsia membru PN nian.
Tuir orsamentu ne’ebé Agência Tatoli hetan asesu iha Portál Transparénsia katak orijen OJE 2019 ho biliaun $1,482, kompromisu $132,755,318.24, obrigasaun $104,372,508.43, atuál $589,601,481.98, balansu $655,270,691.35, no totál ezekusaun hamutuk porsentu 46.8.
Entretantu, Debate Envelope Fiskál 2020 ne’e taka ba média hotu.
Notísia Relevante : Governu Aprova Ona Tetu Fiskál 2020
Governu Realiza Sesaun Traballu Jornada Orsamentál Nu’udar Inísiu Preparasaun OJE
Jornalista: Antónia Gusmão
Editora : Maria Auxiliadora
