DILI, 07 agostu 2019 (TATOLI)-Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, informa MTKI prepara ona planu mestre (master plan) hodi fó prioridade ba sítiu turístiku sira ne’ebé sai ikóniku (símbolu) munisípiu sira iha 2020.
Planu prioridade ba sítiu turístika sira ne’ebé sai ikóniku munisípiu sira ne’e bazeia ba Planu Estratéjiku Dezenvolvimentu Nasionál (PEDN) 2011 to’o 2030.
“Iha Orsamentu Jerál Estadu 2020 no master plan ne’e, ami sei foka liu ba sítiu turístika sira ne’ebé sai icon iha parte Leste, Sentrál no Oeste hodi bele dezenvolve atu atrai turista sira,” Diretór Jerál Turizmu dehan iha Portu Dili, ohin.
José Quintas afirma sítiu ikóniku ne’e iha parte Leste sei fó prioridade ba Parke Nasionál Nino Konis Santana liuliu Illa Jaku, parte Sentrál foka Kristu Rei no Oeste foku ba bee-manas Marobo no Foho Ramelau.
Nia adianta planu mestre ne’e, MTKI sei prevee osan millaun U$1,5 ba planu integradu ida hodi haree ba impaktu ambientál, sosiál no ekonómiku hodi dezenvolve no hadi’a infraestrutura sítiu turístiku sira ne’e.
“Ita ko’alia dezenvolvimentu setór turístiku, ita presiza dezenvolve fazeadamente tanba ita-nia kapasidade finanseira limitada ne’ebé susar atu dezenvolve iha tempu hanesan”, katak.
Nia salienta iha 2020, fó prioridade dahuluk ba sítiu turístiku ikóniku sira no tuir fali ba dezenvolve fatin turizmu istóriku, relijiozu, kultura no seluk tan.
Tanba ne’e, Oitavu Governu Konstitusionál liuhusi Konsellu Ministru aprova ona estabelese komisaun interministeriál atu dezenvolvimentu setór turizmu iha Timor-Leste.
“Importante la halimar para liña ministeriál bele fó apoiu ba dezenvolve setór turizmu liuliu infrastrutura bázika, konetividade, presu aviaun no vistu para ita bele dada turista sira mai vizita ita-nia rai.”
Jornalista: Florencio Miranda Ximenes
Editora : Maria Auxiliadora
