DILI, 07 agostu 2019 (TATOLI)-Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, hatete atu dezenvolve no komersializa setór turizmu iha Timor Leste presiza servisu hamutuk ho liña ministeriál tomak hodi hadi’a infrastrutura, konetividade, rede internét hodi bele atrai turista sira.
“Pontu importante mak ita tenke haree didi’ak estabilidade nasaun hodi povu hakmatek ne’e nu’udar imajen ida importante atu atrai turista sira mai vizita hodi lori naran Timor-Leste ba internasionál”, Diretór Jerál Turizmu afirma ba jornalista sira iha Portu Dili, ohin.
Tanba iha nasaun ne’ebé de’it atu dezenvolve no promove setór turizmu mak estabilidade laiha no povu la hakmatek mak turista sira susar atu mai no ema susar atu halo investimentu.
Haree ba situasaun reál, José Quintas afirma povu Timor-Leste hahú hakmatek hodi kontribui ba estabilidade no pás, ne’ebé turista barak hahú vizita ona Timor-Leste iha 2019.
“Timor-Leste prontu ona atu simu bainaka liuliu turista sira tanba iha ona estabilidade no hahú loke dalan atu ita hatudu imajen Timor-Leste ba mundu”, katak.
Nia dehan bá oin povu kontinua garante estabilidade atu turista sira bele vizita Timór. “Ita hotu espera katak povu kontinua garante estabilidade para dudu dezenvolvimentu nasionál liuliu iha setór turizmu iha Timor-Leste.”
Iha tinan ne’e, nia dehan iha janeiru ró kruzeiru vizita dala-rua ho turista husi nasaun barak no iha marsu ró kruzeiru vizita dala-ida no ohin, ró kruzeiru Pacific Dawn vizita tan Timór ho turista hamutuk 1.658.
Jornalista : Florencio Miranda Ximenes
Editora : Maria Auxiliadora
