DILI, 09 agostu 2019 (TATOLI) – Komisaun Anti Korrupsaun (KAK) deteta kazu korrupsaun 81 no investigadór KAK nian kompleta hela relatóriu preliminár ba kazu 21 atu haruka ba Prokuradór Jerál Repúblika (PGR-sigla portugés).
Notísia Relevante : KAK Deteta Irregularidade iha Instituisaun Estadu Balun
Komisáriu Adjuntu KAK ba Prevensaun no Sensibilizasaun, Luis de Oliveira Sampaio, ohin, ba Ajénsia TATOLI iha Otel Ramelau, Dili, informa, durante tinan 2018, KAK halo investigasaun ba kazu 49 no kazu 42 mak delega hosi Gabinete Prokuradór Jerál.
“KAK konsege kompleta relatóriu finál hamutuk kazu 36 no durante ne’e investiga sasin na’in 748 ho suspeitu na’in 55,” hateten Luis Oliveira Sampaio.
Iha relatóriu KAK nian hatudu katak, aktu pekulatu mak domina, abuzu podér, mal administrasaun, falsifikasaun dokumentu, partisipasaun ekonomia iha negósiu ho subornu.
Ho kazu sira ne’e, Adjuntu Komisáriu KAK, Luis de Oliveira Sampaio, husu ba ajente estadu sira atu serbisu ho integridade no onestidade atu la bele fó prejuizu ba Estadu.
“Ami foin daudauk halo kooperasaun ho instituisaun estadu hanesan Funsaun Publika, Inspetór Jerál Estadu no Provedoria Direitu Umanu no Justisa (PDHJ-sigla portugés) atu buka irregularidade iha instituisaun Estadu hodi promove boa governasaun”, hateten Luis Oliveira Sampaio.
Jornalista : Domingos Piedade Freitas
Editór : Francisco Simões
