iklan

ERMERA, HEADLINE, MUNISÍPIU

Autoridade Munisipál Ermera Sente Laiha Podér iha Administrasaun

Autoridade Munisipál Ermera Sente Laiha Podér iha Administrasaun

Prezidente Autoridade Munsipál Ermera, José Martinho dos Santos Soares.

ERMERA, 12 agostu 2019 (TATOLI) – Prezidente Autoridade Munisipál Ermera, José Martinho dos Santos Soares konsidera durante ne’e Governu Sentrál seidauk fó kompeténsia loloos en-termu administrasaun, nune’e bele tau prioridade ba dezenvolvimentu iha área rurál.

“Agora ami nia problema mak ne’e, kompeténsia ne’ebé entrega ba munisípiu seidauk loloos, tanba lei dehan estrada sira ba suku, ponte ki’ik-oan sira ne’e sai kompeténsia munisípiu nian, maibé iha prátika ami seidauk bele hala’o tanba ita-nia dependénsia mai hosi nasionál’’, nia dehan iha Aifu, Suku Poetete, Munisípiu Ermera, segunda ne’e.

Tuir Prezidente Autoridade ne’e, iha tinan 2020 kontinua nafatin infraestrutura tenke aliña ho polítika Governu nian, hanesan suku 16 ne’ebé oras ne’e seidauk asesu elétrika, nune’e mós ho estrada.

“Estrada rurál sai prioridade, saúde, edukasaun, liliu eskola sira, postu saúde iha suku sira, kontinua sai prioridade ba tinan oin”, nia dehan tan.

Nia akresenta bainhira munisípiu hakarak loke dalan ba suku, hosi nasionál mak tenke aloka orsamentu, maibé bainhira nasionál la tau orsamentu, administrasaun munisípiu labele halo buat ida.

Maski nune’e, tuir nia, Ermera iha poténsia seluk hanesan turizmu relijiozu hanesan Nossa Senhora Peregrina iha Fatubessi, bee-manas iha Leimea, Hatulia, Lagoa iha Eraulu, Mota Bandeira, no turizmu istóriku hanesan subar fatin saudozu Nino Conis Santana iha Mertuto.

“Ha’u haruka ona enjiñeiru sira ba haree no foti ona dadus. Hein de’it bainhira Estadu tau osan, ami hakarak hadi’a ona fatin ne’e, tanba fatin hirak ne’e kapa’as tebes’’, nia haklaken.

Tuir nia, fatin turizmu iha Ermera sai prioridade tanba iha futuru sei hatama osan ba kofre munisipál, nune’e dependénsia ba nasionál ne’e labele maka’as liu.

“Ba tinan oin, ami iha projetu hamutuk 60 no foin dadaun ha’u rona hosi ha’u nia diretór finansa dehan, Konsellu Ministru aprova ona projetu millaun $11. Ami hein katak Ministériu Finansa bele sériu tau osan ba munisípiu sira’’, nia katak.

José dehan Governu Sentrál labele de’it tau osan, maibé tenke fó ho kompeténsia hodi autoridade munisipál bele halo jestaun.

“Ita haree Oé-Cusse nabilan tanba nia iha kompeténsia halo jestaun rasik. Enkuantu Prezidente Autoridade Munisípiu sira seluk, lei seidauk fó dalan atu halo jestaun rasik. Tanba ne’e mak ami iha difikuldade. Maibé, ami fiar metin 2020 ne’e ho kompromisu, ho polítika VIII Governu nian ne’ebé hakarak duni dezenvolvimentu ne’e tenke ba munisípiu sira, sei la’o ho di’ak’’, nia tenik.

Nia espera, Governu iha kompromisu iha polítika desentralizasaun, maski nia hatene iha lei ne’e la fó kompeténsia barak.

“Bele iha vontade polítika kuandu lei la fó dalan. Ida ne’e sai nafatin preokupasaun. Tanba ne’e mak ami hein katak bainhira ita iha vontade polítika ba desentralizasaun ka deskonsentrasaun, tenke tuir mós ho ajustamentu legál nune’e lei bele apoia Autoridade Munisípiu sira bele serbisu ho di’ak no garante funsionamentu serbisu iha públiku munsípiu nian’’, akresenta José.

Jornalista: Evaristo Soares Martins

Editór: Xisto Freitas

iklan
iklan

Leave a Reply

iklan
error: Content is protected !!