DILI, 13 agostu 2019 (TATOLI)– Komisaun Anti Korrupsaun (CAC-sigla inglés) propoin atu kargu xefia sira hosi setór públiku iha obrigasaun atu aprezenta mós rikusoin ba iha Tribunal Rekursu (TR).
Notísia Relevante : KAK Deteta Irregularidade iha Instituisaun Estadu Balun
Kargu xefia sira ne’ebé KAK propoin ne’e mak hanesan Diretór Nasionál, Diretór Jerál inklui mós Xefe Departamentu sira ho razaun ema hirak nee hala’o servisu estadu nian. Iha posibilidade no fasil tebes monu ba tentasaun korrupsaun.
“Ha’u hanoin oras nee daudaun funsionáriu KAK nian ne’ebé mak espesializada iha anti korrupsaun tuir hela formasaun kona ba prevensaun korrupsaun, liuliu ba deklarasaun ativu rikusoin ninian, mak KAK propoin hodi aplika mós ba kargu xefia sira hodi promove boa governasaun iha setór públiku,” hateten Komisáriu KAK, Sergio Hornay, hodi responde ajénsia TATOLI, ohin, iha ámbitu semináriu kona-ba prevensaun korrupsaun ne’ebé hala’o iha Otél Ramelau, Dili.
Notísia Relevante : KAK Sei Haruka Kazu Korrupsaun 21 Ba PJR
Nia hateten, durante nee aprezentasaun rikusoin aplika ona ba órgaun soberanu sira, eis titulares no mós deputadu sira, maibé ba iha kargu xefia sira presiza propoin hodi implementa mós kona ba aktu kombate korrupsaun.
Nia afirma liu tan, bele mós aplika aprezentasaun rikusoin ba iha diresaun sira ne’ebé mak iha poténsia mosu krime korrupsaun mak hanesan emigrasaun, alfándega, aero portu, servisu impostu, servisu kuarentena no servisu aprovizionamentu nian.
Jornalista : Domingos Piedade Freitas
Editór : Francisco Simões
