DILI,14 agostu 2019 (TATOLI)-Ekipa Tékniku hosi Diresaun Nasionál Rejistu no Notariadu (DNRN), Ministériu Justisa (MJ) ho World Vision Timor-Leste, semana oin, hahú rejistu sertidaun moris ba labarik sira hosi tinan 0-5 iha Munisípiu Baucau ho Aileu, durante agostu to’o setembru 2019.
Notísia Relevante : MJ-World Vision Asina Akordu Rejista Labarik
Diretór Jerál Serbisu Rejistu no Notariadu, Ministériu Justisa, Crisogno da Costa Neto, hateten, iha Munisípiu Baucau parte rua identifika ona suku lima no Munisípiu Aileu iha suku haat ne’ebé identifika labarik barak maka seidauk rejistu hodi hetan sertidaun moris RDTL.
“Prósima semana ne’e rejistrasaun sei hala’o lansamentu iha Baucau,” informa Diretór Jerál DNRN, Crisogno da Costa Neto, ohin, ba ajénsia TATOLI, iha ninia servisu fatin, Bebora, Dili.
Iha Munisípiu Baucau, ekipa tékniku halo rejistu moris ba labarik sira iha Suku Samalari depois kontinua ba Suku Buibau, Suku Uailili, Gari-Uai no ikus iha Tirilolo.
Prosesu rejistrasaun iha munisípiu rai-klaran Aileu iha posibilidade sei hala’o durante fulan setembru tanba sei finaliza uluk iha suku lima iha Munisípiu Baucau nian.
Projetu ne’e gastu orsamentu hamutuk $139.821 ne’ebe finansia hosi World Vision Timor-Leste. Maibé, hosi total fundu ne’e Ministériu Justisa jere $70.725 no rihun $ 69.096 jere hosi World Vision rasik.
“Governu liuhosi diresaun ne’e ba implementa de’it intermus tékniku agora orsamentu ne’e porsentu 100 hosi World Vision,” Crisogno da Costa Neto, esklarese.
Durante prosesu ne’e lao hosi parte World Vision mós sei akompaña hodi halo monitorizasaun. Diretór ne’e realsa, rekizitu ba labarik sira atu hetan sertidaun moris RDTL maka tenke iha dokumentu maternidade bainhira inan ida partu iha ospitál, lori sertidaun kazamentu no mós sertidaun RDTL hosi Inan no Aman nian bainhira atu halo rejistu moris ba oan sira.
Jornalista : Agapito dos Santos
Editór : Francisco Simões
