DILI, 16 agostu 2019 (TATOLI) – Komisaun Anti Korrupsaun (CAC-sigla portugés) kontinua hein atu Parlamentu Nasionál bele aprova lalais Lei Anti Korrupsaun atu bele fasilita di’ak liu tan KAK nia servisu.
Notísia Relevante : Tempu Badak PN Sei Aprova Lei Anti Korrupsaun Hodi Reforsa KAK
Komisáriu Adjuntu KAK ba Prevensaun no Sensibilizasaun, Luis de Oliveira Sampaio, informa, lei anti korrupsaun importante tebes ba KAK atu hala’o servisu kombate korrupsaun iha Timor-Leste.
“Ha’u hanoin lei anti korrupsaun importante tebes ba KAK, se lae iha aspetu balun difikulta servisu KAK,” hateten Komisáriu Luis de Oliveira Sampaio, foin lalais ne’e, hodi responde Ajénsia TATOLI, bainhira partisipa semináriu kona ba prevensaun no sensibilizasaun iha Otél Ramelau, Dili.
Notísia Relevante : Prioridade PN Iha 2019 Kona-ba Lejislasaun Mak Konklui Lei Anti Korrupsaun
Luis Sampaio informa, lei KAK parte jeneralidade Parlamentu Nasionál aprova tiha ona, maibé komisaun A sei haree hela artigu por artigu iha espesialidade nian. Tanba ne’e Komisáriu KAK ne’e otimista katak iha tinan 2020 lei KAK bele aprova ona iha espesialidade atu finaliza servisu KAK nian.
Jornalista : Domingos Piedade Freitas
Editór : Francisco Simões
