DILI, 16 agostu 2019 (TATOLI) – Prezidente Tribunál Rekursu (PTR), Deolindo dos Santos, hatete iha loron 16 setembru, sei iha rotasaun servisu ba juis sira no halo mós rekrutamentu foun ba juis sira.
“Iha biban ne’e, juis balun ne’ebé mak mai husi foho hanesan Baukau, Suai no Oekusi sei mai fali iha Tribunál Distritál Dili no sira husi Dili ba fali Suai, Baukau no Oekuai, ho razaun atu hala’o servisu Tribunál ho lalais,” hateten Deolindo dos Santos ba jornalista sira iha Tribunál Rekursu, Kaikoli, ohin.
Nia hatutan, iha mós pedidu balun mak hato’o ona ba Ministériu Justisa atu iha rekrutamentu ba juis foun no konsellu ratifika ona pedidu hodi hein de’it bainhira mak akontese.
Kona ba ofisiál Justisa iha Tribunál Dili, Baukau, Oekusi, Suai inklui mós Tribunál Rekursu, Deolindo dos Santos hateten, tribunál sira la falta ofisiál justisa tanba sufisiente ona hodi hala’o servisu di’ak liu tan.
Agora, iha Tribunál balun, nia dehan hanoin ona atu halo distribuisaun ba ofisiál justisa sira hotu atu atende juis di’ak liu tan.
Nia hatutan, kona ofisiál justisa iha Tribunál Dili iha problema uitoan maibé di’ak liu tenke halo jestaun ne’ebé mak di’ak atu bele atende servisu ho di’ak, maibé númeru ofisial justisa iha Dili boot tebetebes ona.
Jornalista : Domingos Piedade Freitas
Editór : Francisco Simões
