DILI, 17 agostu 2019 (TATOLI) – Klube Lalenok United FC dere Atlético Ultramar ho golu 4-1 iha jogu kontinuasaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, ohin.
Vitória ne’ebé Lalenok hetan lori ekipa refere kontinua lidera tabela klasifikasaun ho pontu 19. Enkuantu, Ultramar mantein túr iha zona dezpromosaun ho pontu 7.
Golu Lalenok hatama hosi jogadór Italo Pimentel (28) iha minutu 38, Glaco Trajano (5) 45+1, Elias Mesquita (10) 69, Yohanes Gusmão (12) 90+1 no golu úniku Ultramar hatama hosi Jorge Godinho (22) iha minutu ’18.
Maski lakon, treinadór Ultramar, Gaspar Pinto ba Agência Tatoli konfesa katak nia ekipa derrota tanba falla iha parte avansadu no baliza.
“Ohin ami lakon tanba falla ne’e iha avansadu. Ami-nia avansadu seidauk másimu no baliza mak ladún di’ak,” dehan Gaspar.
Nia hatutan, jogu tuir mai, Ultramar sei hasoru nafatin Lalenok iha Tasa 12 de Novembru. Gaspar garante sei manán tanba jogadór Ultramar nian rua dadaun ne’e viajen ona mai Timor-Leste.
“Ha’u hanoin ami lakon iha jogu ida ne’e de’it, maibé ami sei iha jogu lima tuir mai ha’u hanoin ami sei esforsu para manán hotu no tasa 12 Novembru ami sei hasoru nafatin Lalenok ha’u hanoin ami sei manán tanba jogadór Brazileiru rua sei to’o semana oin,” nia haktuir.
Iha sorin seluk, treinadór Lalenok FC, Yance Matmey sente orgullu tanba bele lori Lalenok hetan vitória maski sei iha jogu lima tuir mai todan.
“Ha’u agradese ba Nai Maromak tanba ohin ami bele manán iha jogu ohin. Ha’u fiar ba oin ami sei hadi’a di’ak liu-tan nune’e bele manán tan,” katak Yance.
Entretantu, jogu kontinuasaun LFA hala’o iha loron hanesan, iha Estádiu Munisipál Malibaca Maliana entre Boavista FC Timor Vs Assalam FC rezulta golu impata 1-1. Golu Boavista prodúz hosi jogadór Rafael Marti (5) iha minutu 8 no golu Assalam hatama hosi Filipe Borges (17) iha minutu 2.
Jornalista: Hortençio Sanchez
Editór: Xisto Freitas
