DILI, 20 agostu 2019 (TATOLI)-Ministru Negósiu Estrangeiru no Kooperasaun (MNEK), Dionísio da Costa Babo Soares hato’o parabéns ba komemorasaun Aniversáriu FALINTIL ba 44.
“Primeiru hakarak fó parabéns ba ita-nia aas wa´in sira, ne’ebé uluk luta iha ai-laran agora sei moris. Liliu, respeitu ba sira ne’ebé soe sira-nia ruin no ran hodi liberta ita-nia rai,” kongratula diplomata timoroan, Dionísio Babo Soares perante mídia hafoin ramata partisipa komemorasaun Aniversáriu FALINTIL ba 44 iha Kuartel Jerál F-FDTL, Fatuhada, tersa (20/8/2019).
Diplomata timoroan ne’e hateten, agora ita hotu-hotu no jerasaun foun sira, tenke hamutuk serbisu hodi bele alkansa mehi uluk ne’ebé sira trasa tiha ona. “Ita labele husik buat ne’e monu ba rai, tenke halo ho konfiansa ho lealdade ba ita-nia nasaun para ita-nia povu bele moris di’ak liután, ha´u hanoin ne’e importante tebestebes”.
Iha biban hanesan, Ministru Dionísio Babo hato’o Mensagem katak, ita lalika hanoin tan buat seluk ona, hanoin hanusa mak serbisu para bele priense itania independénsia ne’e. “Liuliu hodi alkansa mehi ne’ebé ema sira (eroi sira) uluk luta tiha ona ba ita-nia rain”.
Eis-ministru Justisa iha Sestu Governu Konstitusionál ne´e hateten tan katak, ita-nia Forsa Defesa F-FDTL, komesa dezenvolve nafatin. “Ha´u hanoin sira sa’e tiha ona ba faze ida profesionál tebestebes”.
“Ita espera katak ho partisipasaun ita-nia forsa ne’e iha nível internasionál no forsa sira seluk iha mundu ne’e. Ha´u hanoin bele aumenta liután sira-nia profesionalizmu,” tenik diplomata timoroan ne’e.
Hodi hatutan tan katak: “Liliu hala’o tuir reformas ne’ebé halo hela iha forsas armadas nia laran, para tuir planu 2020 ne’e bele sai forsa ida profisionál, la’ós iha rejiaun de’it mas iha mundu tomak,” konsidera governante ne´e.
Notísia relevnte:Presiza Valoriza Loron FALINTIL Hanesan Loron Nasionál
Jornalista : Nelia Fernandes
Editór : Rafy Belo
