Aileu, 22 agostu 2019 (TATOLI)–Koordenadór Grupu Kooperativa hosi Suku Faturilau, Postu Administrativu Lekidoe, Munisípiu Aileu, Zacarias da Costa, informa grupu ne’e prodús bani-been ho kuantidade boot iha 2019, tanba produsaun bani-been nu’udar kustume beiala sira nian.
“Ami nia produsaun bani-been ba oin nafatin, ami agradese tanba iha oportunidade ne’e Sekretáriu Estadu Kooperativa bele mai ami-nia suku hodi haree direta ba produsaun ne’e”, Zacarias ba jornalista sira hafoin Sekretáriu Estadu Kooperativa (SEKoop), Arsénio Pereira, hala’o vizita, ohin.
Grupu kooperativa prodús bani-been no tau iha bidón, no lori ba fa’an iha Dili ho folin $20 kada litru lima.
Ho produsaun bani-been, SEKoop, Arsénio Pereira, afirma polítika Governu nian maka atu tau atensaun ba bani-been, atu oinsá insentiva grupu kooperativa hodi prezerva produtu bani-been ho di’ak.
“Ohin sira prodús bani-been no tau iha bidón ida, ha’u orienta ha’u-nia tékniku hodi dezeña nia fatin hodi prezerva bani-been ho di’ak” katak.
Governante ne’e kompromete katak sei fó insentiva ba grupu kooperativa no sei fó treinamentu oinsá maka bele kuidadu bani-been.
Jornalita : Natalino Costa
Editora : Maria Auxiliadora
