DILI, 23 agostu 2019 (TATOLI) – Defeza ba arguido na’in haat (4) iha kazu oho Vera Carvalho sei halo asaun sivíl hasoru Polisia, Ministériu Públiku ho família Vera nian kona-ba naran di’ak (bom nome) ho indemnizasaun sivíl.
Notísia Relevante : Kazu Oho Vera, Tribunál Absolve Arguidu Na’in Haat
Adelina Maluk Lobo nu’udar Defeza ne’ebé fó asisténsia legal ba arguido na’in haat ne’e hateten, asaun sivíl ne’e pertinente tuir lei tanba nia kliente sira la sala no Polisia ho Ministériu Públiku detein sira iha prizaun preventiva durante tinan ida nia laran kedas.
Tuir kausaun MP nian katak, arguido Natalisto da Costa Ximenes, João Tete Gonçalves, Agostinho de Jesus no Nicolau da Costa mak nu’udar autór ba oho matebian Vera iha area Kristu Liurai (Cristo Rei) hodi ba hakoi subar iha area Subaun, Munisípiu Manatuto. Maibé, horiseik, Tribunál Distritál Dili (TDD) absolve arguido sira husi akuzasaun tanba faktu ne’ebé aprezenta husi MP la forte.
Nia dehan ba kazu Vera nee, nu’udar defeza sei la rekorre ba Tribunal Rekursu (TR) tanba konkorda ho desizaun Tribunal Distritál Dili (TDD) nia desizaun, karik MP mak halo rekorre maibé tenke iha baze fundamentu.
“Ha’u nu’udar defeza iha ona planu atu hatama asaun sivíl rekuperasaun ba naran di’ak no indemnizasaun sivíl,” hateten Adelina Maluk Lobo, ohin, hodi responde Ajénsia TATOLI liuhusi WhatsApp.
Nia hatutan, sei halo mós asaun krime seluk hodi kontra ezekutor lei mak hanesan PNTL liu husi Polisia Nasional Servisu Investigasaun Kriminál (PNSIC-sigla portugés) no Ministériu Públiku tanba konsidera erru mai husi sira. Tamba nee, tenke iha keixa hodi hahú prosesu investigasaun ba kazu nee.
Jornalista : Domingos Piedade Freitas
Editór : Francisco Simões
