DILI, 26 agostu 2016 (TATOLI) – Reprezentante Ministériu Ensinu Superiór Siénsia no Kultura (MESSK), Diretór Nasionál Kurríkulu Ensinu superiór, Luís Aparício Guterres hateten, jerasaun foun presiza hatene istória tanba se sira la hatene istória domin ba rai ne’e mós sei falta.
“Tanba se maka mate timoroan maka mate; sira-nia aman, avón, tiu sira maka mate, atu iha domin tenkesér iha koñesimentu ba istória,” dehan Diretór Luis Aparício Guterres ba jornalista Ajénsia TATOLI, iha Kampus Sentrál, UNTL (Universidade Nasionál Timor Lorosa’e), hafoin partisipa abertura espozisaun kona-ba “Ética da Resistência e os Tratados da Indepedência”, segunda (26/08/2019).
Reprezentante MESSK ne’e konsidera objetu rezisténsia hanesan fotografia, dokumentu istóriku, istória rezisténsia seluk tan iha valór ba nasaun iha prezente no ba futuru, nune’e joven sira bele iha domin ba rai ida ne’e. “Independénsia la hetan husi bandeja maibé husi terus no mate,” dehan Diretór Luís Aparício Guterres.
Eis-profesór ne’e esplika, atu joven sira bele iha liután koñesimentu ba istória Timór nian, universidade sira presiza kria departamentu istória, atu estudante sira bele peskiza kle’an liu kona-ba istória rai ne’e nian.
Notísia relevante:UNTL Sei Estabelese Tan Departamentu Istória no Patrimóniu
Jornalista: Nelia Borges
Editór : Rafy Belo
