DILI, 26 agostu 2019 (TATOLI)–Diretór AMRT (Arkivu no Múzeu Rezisténsia Timor-Leste), Antoninho Batista Alves “Hamar” hateten, país ida laiha memória laiha futuru. Se lakohi atu hatene ita-nia istória, ita lakon ita-nia karakterístika orijen atu defende nasaun ida ne’e.
“Tanba ne’e, ba joven sira buka halo reflesaun ba kotuk antes atu projeta ba futuru,” sujere Diretór Antoninho Batista Alves “Hamar”, iha entrevista ho jornalista Ajénsia TATOLI, iha espozisaun kona-ba “Ética da Resistência e os Tratados da Indepedência” iha Kampus Sentrál, UNTL (Universidade Nasionál Timor Lorosa’e), horseik.
Uza Teknolojia Ho Disiplina
Iha biban hanesan, Diretór AMRT ne’e esplika katak ita ohin loron iha era miléniu ne’ebé ho mudansa teknolojia avansada tebes fó ameasa boot ba karakter invazaun ita nian.
“Invazaun teknolojia ne’e ameasa boot ba vida umanu, se maka lahatene uza, lahatene adapta no aplika nia disiplina ho rigorozu, kombate nia aktu diária ne’ebé perturba nia vida rasik, nia sei lakon dignidade no oportunidade ba moris rasik”.
“Buat hanesan ne’e fila fali ba ita nia uma laran, organiza an rasik ho kalendáriu diária para kombate asaun extra ne’ebé dada tempu tomak ba atividade ne’ebé la serve ba futuru, hamenus ida ne’e para hatene ita-nia orijen no hasoru dezafiu hotu iha futuru,” nia konsidera.
Liga ho espozisaun kona-ba “Ética da Resistência e os Tratados da Indepedência”, Diretór AMRT, Antoninho Batista Alves “Hamar” esplika katak komportamentu ema ida-ida nian iha organizasaun nia laran maka asegura forsa maiór ida hodi hetan independénsia.
Nune’e maka espozisaun kona-ba “Ética da Resistência e os Tratados da Indepedência” ne’e, tuir Diretór Antoninho Batista Alves “Hamar” katak asaun ne’ebé lori ema barak ba funu maibé la minimiza sira-nia morál no kapasidade defende independénsia.
“Iha rezisténsia nia laran, ita moris iha organizasaun ida. Mudansa barak no ema sira partisipa ne’e iha commitment (komprimisu), konviksaun no vontade tomak hodi kontribui ba iha dezenvolvimentu polítika no dezenvolvimentu estratéjika funu nian,” tenik diretór ne’e.
“Iha organizasaun, se mak la halo tuir regra bele hetan sansaun polítika nune’e mós iha rezisténsia nia laran se maka laiha estratéjia no kuidadu, nia monu ba kapturasaun no bele monu ba risku vida nian tanba ne’e maka organizasaun ezije hotu-hotu iha organizasaun nia laran tenke disiplina no iha asaun de unidade no konsensu,” esplika Diretór Antoninho Batista Alves.
Notísia relevante:“Iha Domin Ba Nasaun, Tenke Iha Mós Koñesimentu Ba Istória”
Jornalista: Nelia Borges
Editór : Rafy Belo
