DILI, 27 agostu 2019 (TATOLI)-Asosiasaun Parteira Timor-Leste (APTL-sigla portugés), Munisípiu Dili komemora loron Konsulta Populár ba dala 20 ho marsa Saudavel no mós halo promosaun ba susubeen inan nian, hodi haboot espíritu nasionalizmu parteira sira nian hodi fó kontribuisaun ba dezenvolvimentu nasionál iha área saúde inkluzivamente iha materna infantíl.
“Atividade ne’e ami kolabora hamutuk ho Organizasaun Saúde Mundiál hodi halo promosaun susubeen inan nian ba kosok oan sira ne’ebé foin moris,” dehan Prezidente APTL, Munisipiu Dili, Sara Maria Filomena Xavier ba Ajénsia TATOLI, iha Largo Lecidere, ohin.
Nia kompromete, APTL nia planu ba oin, iha tempu badak, sei serbisu hamutuk ho Organizasaun Saúde Mundiál (OMS) hodi hala’o semináriu kona-ba importánsia susubeen inan nian ba bebé kosok oan foin moris no oinsá importánsia kontaktu kulit ba kulit bebé ho inan bainhira bebé moris mai.
Entretantu, atividade marsa saudavel ne’e partisipa sira husi parteira sira iha Munisípiu Dili no mós estudante parteira, Fakuldade Saúde, ISC (Instituto Superior Cristal), Dili.
Marsa saudavel ne’e hahú husi edifísiu Ministériu Negósiu Estranjeiru no Kooperasaun (MNEK) nia oin to’o iha Largo Lecidere.
Notísia relevante:Susubeen Inan Nakonu Imunidade Ba Bebé Hodi Kontra Infesaun
Jornalista: Felicidade Ximenes
Editór : Rafy Belo
