DILI, 27 agostu 2019 (TATOLI)-Diretora Nasionál Emprendimentu Atividade Produtu Turístiku, Ernestina Lopes, hatete tuir dadus Ministériu Turizmu, Komérsiu no Indústria (MTKI) katak restaurante nasionál no internasionál porsentu 45 iha sira-nia lista menu komesa promove ona hahán lokál.
Entretantu, Diretora Nasionál ne’e afirma sobre restaurante iha rai-laran, públiku preokupa katak maski hahán sabór, maibé laiha ijiene maka difisil tebes atu ema hakbesik.
“Los duni ema hatete ita-nia hahán sabór kapás, importante tenke haree mós ijiene. Ne’ebé durante ne’e ami-nia diresaun fó treinamentu ba restaurante sira tantu iha nasionál to’o munisípiu 12 ho objetivu atu restaurante sira hadi’a atendimentu no mós hanorin sira oinsá prepara hahán ho ijiene”, Ernestina afirma iha abertura feira gastronomia ne’ebé realiza iha Sentru Konvensaun Dili (CCD, sigla portugés), ohin.
Diretora ne’e hatutan formasaun ba restaurante sira kontinua hodi promove nafatin ai-han lokál tanba ida ne’e maka hahán ne’ebé orgániku no saudavel.
Ministru Turizmu, Komérsiu no Indústria interinu, Fidelis Manuel Leite Magalhães, dehan nia parte fó ona orientasaun ba Autoridade Inspesaun no Fiskalizasaun ba Atividade Ekonómika no Sanitária (AEFAESA) atu kontrola restaurante sira hodi asegura seguransa ba ai-han.
“Ha’u foin lalais fó ona instrusaun ba Sekretáriu Estadu Komunikasaun Sosiál katak ba ita-boot (restaurante) sira ne’ebé di’ak liu no moos liu merese atu hetan promosaun gratuita hosi Governu para ita boot sira bele asesu ba RTTL hanesan meius komunikasaun, nune’e públiku bele hatene hotu katak ita-boot sira maka di’ak liu ein termu sanitasaun no kualidade ai-han nian ho ida ne’e hanesan mós MKAE interinu ha’u husu ona ba AIFAESA atu kontrola”, dehan Fidelis Manuel Leite Magalhães.
Liuhosi kontrolu AIFAESA nian maka restaurante ne’ebé di’ak liu no moos maka Governu iha devér atu promove.
Notísia relevante : Kombinasaun Hahán Lokál Furak, Vikeke Sai Vensedór Iha Kompetisaun
Jornalista : Antónia Gusmão
Editora : Maria Auxiliadora
