DILI, 28 agostu 2019(TATOLI)-Adjuntu Sekretáriu Jerál g7+, Habib Ur Rheman Mayar hateten katak delegasaun g7+ hakarak vizita Mota-ain, fronteira entre Timor-Leste (TL) no Repúblika Indonézia (RI) atu estuda esperiénsia rekonsiliasaun entre país rua.
“Ohin delegasaun sira mai no haree rasik situasaun komunidade entre parte rua. Depois, rekonsiliasaun Timor-Leste no Indonézia inspira tebes,” hateten Adjuntu Habib Ur Rheman Mayar ba jornalista sira, iha Mota-ain, kuarta (28/08/2019).
Nia kompara, Prezidente Komisaun Paz no Rekonsiliasaun Sudan Sul nian, nia interese tebes atu foti esperiénsia rekonsiliasaun entre Timor-Leste no Indonézia hodi bele aplika fali iha Sudaun. “Iha akordu dame Sudaun Sul, ne’e parte ida husi justisa tranzisionál”.
Iha biban hanesan, Adjuntu Sekretáriu Jerál g7+, Habib Ur Rheman Mayar informa katak hafoin vizita ne’e, sei konvida mós Timor-Leste, g7+ no CNC ba iha Sudaun hodi bele fahe esperiénsia kona-ba rekonsiliasaun entre Timor-Leste no Indonézia.
“Esperiénsia valór tebes. Timor-Leste mós liu ona ho situasaun sira ne’ebé difisil maibé agora iha pás, estabilidade no ida nee inspira tebes sira,” nia konsidera.
Adjuntu ne’e akresenta tan katak ko’alia kona-ba kontextu Timor-Leste diferente ho Guiné Bissau, Repúblika Áfrika Sentrál no seluk tan maibé enjerál situasaun ne’ebé enfrenta kuaze hanesan tanba ne’e, tuir nia, Xanana Gusmão hakarak atu nasaun sira iha g7+ bele estuda.
“Labele konsidera pás no estabilidade hanesan granted maibé tenke iha korajen no koko atu haforsa tan nune’e jerasaun foun mai bele estuda husi ida ne’e tanba ha’u haree ema Timór ne’e aten brani tebes, atu foti inisiativa ida ne’e no rekonsilia sira-nia deferénsia hodi sai unidade,” dehan Adjuntu Sekretáriu Jerál g7+, Habib Ur Rheman Mayar.
Notísia relevante:Delegasaun g7+ Observa Relasaun Amizade Entre TL-RI Iha Fronteira
Jornalista: Nelia Borges
Editór : Rafy Belo
