DILI, 29 agostu 2019 (TATOLI)-Ministru Obra Públika, Salvador Eugénio Soares dos Reis Pires, hatete Estadu Timor-Leste hakuak metin relijiaun oin-oin iha país tanba Konstituisaun Repúblika Demokrátika Timor-Leste mós garante ida ne’e.
“Governu presiza nafatin ita-boot sira-nia apoia no kontribuisaun ba dezenvolvimentu nasionál”, Ministru Salvador afirma iha ámbitu reza hamutuk ho Komunidade Musulmanu sira iha Timor-Leste iha Kampun Alor, ohin.
Iha selebrasaun Loron Konsulta Populár ba-dala-20 ne’e, ministru husu ba Komunidade Musulmanu atu harohan no reza ba líder timoroan no populasaun tomak atubele hamutuk hodi dezenvolve rai ida ne’e no husu mós atu kontinua kontribui pás no estabilidade.
“Ita hotu-hotu presiza kontribui ba pás no estabilidade atu dezenvolve Timor-Leste”, katak.
Tanba ne’e, Ministru Salvador lori Governu nia naran agradese tebes ba komunidade ne’e iha Timor Leste ne’ebé durante ne’e kontribui ona ba prosesu dezenvolvimentu nasionál.
Iha fatin hanesan, Prezidente Konsellu Nasionál Izlámika Timor-Leste (CONESTIL, sigla portugés), Pasqual Sidik Lemorai, dehan musulmanu sira kontinua harohan ba Allah SWT atu haraik bensaun no grasa ba líder timoroan no populasaun tomak ne’ebé selebra nia loron importante ne’e iha 30 agostu.
“Ita Komunidade Musulmanu Timor-Leste hahí no harohan ba Allah STW, atu haraik grasa no matak malirin ba tinan 20 Loron Konsulta Populár atu na’in nia domin horik iha ita idak-idak nia neon no laran nune’e kria pás, dame, rekonsiliasaun, rekonstrusaun no dezenvolvimentu nasionál sei buras no hadikin to’o loron ikus”, Pasqual katak.
Iha reza agradesimentu ba Loron Konsulta Populár ne’e partisipa direita husi Komunidade Musulmanu sira ne’ebé ho sidadaun timoroan no Indonézia.
Iha ámbitu komemorasaun ba loron istóriku Timor-Leste nian ne’e, konfisaun relijioza prinsipál lima iha Timor-Leste, iha loron 29 agostu, realiza mós selebrasaun relijioza ne’ebé mak konta mós ho prezensa husi membru Governu VIII.
Selebrasaun Katólika, hala’o iha Igreja Katedrál, Dili no konta ho prezensa husi Ministru Justisa, selebrasaun Protestante hala’o iha Igreja Osana no konta ho prezensa husi Ministra Edukasaun Juventude no Desportu, no Ministru Obra Públika akompaña serimónia Musulmanu iha Meskita An-Nur, selebrasaun iha Templu Budista akompaña husi Vise-Ministru ba Dezenvolvimentu Estratéjiku Saúde no ikus liu, serimónia Indú, iha templu Pura Giri Natha no konta ho prezensa husi Ministru Agrikultura no Peska.
Notísia relevante : “Iha Ami-Nia Orasaun Sei La Haluha Temi Timór”
Jornalista : Florencio Miranda Ximenes
Editora : Maria Auxiliadora
