DILI, 30 agostu 2019 (TATOLI) – Prezidente Parlamentu Nasionál (PPN), Arão Noé de Jesus da Costa Amaral, konsidera Konsulta Populár hanesan konkluzaun husi Timor-Leste nia luta, hahú husi 1975, nu’udar forma permanente husi entidade povu Timor.
“Ohin loron ema hotu rekoñese prosesu independénsia Timor-Leste, hanesan kazu susesu ida, maibé la’ós to’o iha ne’e de’it. Durante tinan barak nia laran, espesiál iha rejiaun, hanesan nasaun ida ne’ebé la hakmatek. Ema uituan mak fiar hodi luta hamutuk ho ita, ba auto-determinasaun povu”, tenik iha sesaun solene ámbitu Komemorasaun Tinan 20 Referendu (Konsulta Pupulár) no Misaun INTERFET, iha Plenáriu Parlamentu Nasionál (PN), sesta ne’e.
Arão Noé agradese mós ba komunidade internasionál sira-nia kontribuisaun iha prosesu luta libertasaun to’o hetan independénsia, liliu ba Portugal.
“Polítiku portugés barak mak kontribui, ne’ebé só bele sita balun de’it. Tanba ne’e, ha’u agradese ba nasaun no povu irmaun Portugal”, nia subliña.
La-haluha mós PPN agradese ba Komunidade Nasaun Ko’alia Lian Portugés (CPLP-sigla portugués), ne’ebé sempre ho Timor-Leste iha kualker momentu no bainhira Timor-Leste seidauk hetan independénsia sira fó ona apoiu no vontande.
Iha biban ne’e, Deputadu Bankada CNRT ne’e konsidera mós apoiu husi povu Indonézia balun, ne’ebé luta hamutuk ba demokarasia, nune’e nasaun ida ne’e bele hetan oportunidade expresa ho livre, iha rohan mandatu rejime Suharto.
Nia mós sita papél Organizasaun Nasaun Unida (ONU), ne’ebé kontribui ba prosesu kazu Timor-Leste to’o hetan independénsia.
“Hafoin tinan 20 Konsulta Populár, konsolida independénsia. Tratadu Fronteira Marítima ho Austrália ohin sei vigora”, nia akresenta.
Jornalista: Evaristo Soares Martins
Editór: Xisto Freitas
