DILI, 02 setembru 2019 (TATOLI) – Diretór Jerál Turizmu hosi Ministériu Turizmu, Komérsiu no Indústria (MTKI), José Filipe Dias Quintas, informa Timor-Leste sei promove nia identidade iha espozisaun Dubai 2020.
“Ita sei hatudu no promove identidade Timor-Leste nian iha expo Dubai 2020. Nu’udar nasaun soberania no nasaun mais joven iha Asean no Pasífiku, ne’ebé ema balun seidauk koñese barak”, Quintas afirma iha nia kna’ar fatin, Faról,ohin.
Quintas friza katak identidade Timor-Leste nian ne’ebé sei promove maka produtu orgánika agríkola hanesan kafé no kamii, área turizmu, mina Timór, dansa kultura no artezenatu.
“Ita sei haree mós atrasaun ka dansa kultura, fa’an artezenatu, produtu lokál ne’ebé orgánika, no promove turizmu liuhosi fatin turístika sira, istória no agro-turizmu, rikusoin mina inklui ita sei kompete mós hahán tradisionál iha Dubai, maibé hosi hirak ne’e sei iha prosesu diskusaun”,katak.
Hosi atividade hirak ne’e, Governu sei prevee orsamentu bazeia ba programa saida maka sei hatudu iha Dubai, tanba orsamentu ne’e depende ba atividade.
“Ami mós komesa haree oinsá prevee orsamentu tanba orsamentu ne’e depende ba atividade ne’ebe ita sei halo iha Dubai, se programa barak konserteza presiza orsamentu lubuk ida”. afirma.
Tanba ne’e, Governu liuhosi liña ministeriál hahú diskute preparasaun Timor-Leste nian partisipa iha espozisaun ne’ebé sei realiza iha outubru 2020.
“Ami halo ona diskusaun ba preparasaun iha nivél liña ministérial hanesan Ministériu Agrikultura no Peska no Setór Privadu sira atu define atividade saida de’it mak sei hala’o iha espozisaun Dubai 2020” katak.
Antes ne’e, Autoridade Nasionál Timor-Leste ba Expo Dubai, Francisco Kalbuadi Lay, halo ona vizita ida ba Dubai hodi haree sítiu ne’ebé atu realiza expo 2020.
Iha vizita ne’e, Governu Dubai apoia fatin no fó asisténsia ba Governu Timor-Leste atu partisipa expo atu promove aan ba mundu.
“Ita agradese ba sira (Dubai) tanba fatin ne’e sira oferese gratuitu ba ita no sira mós fó asisténsia mai ita durante ita organiza espozisaun iha Dubai”, haktuir.
Nia espera katak prezensa Timor-Leste nian iha Expo Dubai 2020, sei dada turista sira no dada investidór sira atu mai investe iha nasaun ne’e. Espozisaun ne’e sei akontese iha Dubai Uni Emirat Arab, hahú 20 outubru 2020 durante fulan-neen, enkuantu área ba expo ne’e kuaze etare 438 (1.080 ac) iha Dubai Exhibition Center, nune’e, partisipasaun ba expo kuaze nasaun 192 inklui Timor-Leste.
Jornalista : Florencio Miranda Ximenes
Editora : Maria Auxiliadora
