DILI, 04 setembru 2019 (TATOLI) – Eskola Ensinu Báziku Nabularan, Postu Administrativu Alas, Munisipiu Manufahi la uza ho didi’ak husi estudante sira tanba kondisaun jeográfika, dook husi komunidade.
Eskola ne’e hari iha 2015 liuhusi projetu PDN (Projetu Dezenvolvimentu Nasionál). Eskola ne’e iha sala tolu inklui profesór mós na’in tolu.
Diretór Jerál Polítika Planeamentu no Parseria, Antoninho Pires hateten, maske kondisaun eskola ne’e deferénsia ho eskola sira seluk maibé Ministériu tenta nafatin buka meius atu eskola ne’e bele utiliza ho didi’ak.
“Antes ne’e populasaun sira mak ezije tenke loke eskola ensinu báziku ida iha Alas atu labarik sira bele asesu ba edukasaun maibé depois harii tiha populasaun sira la asesu,” informa Diretór Antoninho Pires ba jornalista Ajénsia TATOLI iha edifísiu Gráfika Nasionál Timor-Leste, Colmera, segunda liubá
Tanba ne’e, tuir diretór ne’e katak ministériu tenta nafatin ho kontaktu ho edukasaun Munisipál inklui prezidente autoridade Manufahi nian hodi bele buka meius atu eskola ne’e bele funsiona.
Enkuantu, Diretora Nasionál Ensinu Báziku, Ingrasia Cabral subliña katak kondisaun eskola ne’e di’ak maibé ninia pozisaun jeográfika mak la permite tanba labarik sira barak mak hela iha mota sorin, laiha ponte atu asesu kuandu tempu udan.
“Ita hatene katak eskola ne’e harii iha Nabularan oras ne’e la’o normál hela maibé kuandu tempu udan eskola ne’e sei la uza no labarik sira mantein de’it iha Auberliku,” dehan diretora ne’e.
Nia informa, nia parte kontaktu ona diretór eskola refere katak iha 2020 eskola ne’e sei funsiona ho didi’ak tanba agora daudaun tama ona primeiru siklu entaun presiza mantein nafatin atividade eskola nian ho profesór permanente
Diretora Ingrasia haktuir, eskola tolu ne’e harii tanba ejijénsia. Depois harii tiha la uza ho didi’ak. Maibé, kuandu haree didi’ak fatin ne’e mós presiza hetan atensaun, presiza asegura vida estudante sira nian.
Eskola ne’e harii hanesan alternativu atu estudante sira labele lakon matéria iha tempu udan.
Jornalista : Tomé Amado
Editór : Rafy Belo
