DILI, 4 setembru 2019 (TATOLI) — Xefe Bankada Partidu Demokrátiku (PD), António da Conceição ‘Kalohan’, hateten bankada PD sei la apoia diskusaun orsamentu jerál Estadu (OJE) 2020 bainhira estrutura VIII Governu kontinua inkompletu.
“Enkuantu laiha mudansa hahú hosi agora ba to’o dezembru, debate orsamentu 2020 nian PD sei la fó apoiu. Ne’e pozisaun polítika ne’ebé ami hahú hanoin ona. Ida ami fó apoiu uluk ne’e hodi tulun sira hadi’a sira-nia aan hodi kompleta estrutura Governu, nune’e bele iha oportunidade ruma sira bele ko’alia ba malu, hadi’a sasán ne’ebé ladi’ak iha rai ida ne’e, maibé bainhira to’o dezembru laiha tan mudansa ba estrutura Governu nian, jangan harap. Kartaun mean sa’e. Ida ne’e afirmasaun polítika’’, tenik Kalohan ba jornalista sira iha Palásiu Governu, ohin.
Nia dehan sei partisipa ho di’ak iha diskusaun OJE 2020 kuandu iha mudansa no kompleta estrutura Governu hodi garante dezenvolvimentu nasaun nian.
Notísia Relevante: Governu Tenke Estabelese Prazu Solusiona Estrutura Governu
“2019 ita lalika sura ona. Tusan ne’ebé ko’alia dezde 2018 mós seidauk selu, ekonomia povu ki’ik nian barak mak lakon empregu, kompañia nasionál sira ita hakarak fortifika hodi partisipa iha dezenvolvimentu ne’e, sira-nia osan ita trava to’o hela agora. Ne’e duni, buat hotu-hotu paradu hela’’, nia akresenta.
Eis Ministru Edukasaun ne’e observa, tinan ida resin ona mak Parlamentu Nasionál (PN) aprova osan dala-rua no iha outubru orsamentu 2020 sei tama PN atu hahú debate.
Tuir nia, Governu rasik tenke halo reflesaun ba sira-nia aan. Se iha duni pozisaun atu halo dezenvolvimentu ba rai ida ne’e no labele kontinua moris ho situasaun hanesan ne’e ho estrutura inkompletu nafatin de’it hodi husu nafatin Parlamentu fó apoiu.
“Hakarak extende sira-nia hakarak hodi okupa kargu ne’e de’it no fó nafatin espasu hodi sira bele halimar nafatin, maibé la tuir kompromisu iha eleisaun”, nia dehan tan.
Nia haktuir, Governasaun PD ho FRETILIN nian ne’e minoria maibé omnipotente, katak bele halo buat hotu-hotu, maibé Governu agora ho maioria maibé inkompetente, katak labele halo buat ida.
Hatán ba preokupasaun ne’e, Segundu Vise Prezidente PN, Luís Roberto, konsidera atu la apoia OJE ne’e bankada ida-idak nia direitu.
“Ne’e Bankada Parlamentár PD nia direitu. Se iha Bankada Parlamentár balun dehan lakohi tuir iha diskusaun orsamentu 2020 nian ne’e direitu sira-nian. Ne’e la impaktu buat ida’’, dehan Luís Roberto.
Maski nune’e, nia rekoñese estrutura Governu la kompletu fó impaktu maka’as ba ezekusaun orsamentu, tanba ne’e Primeiru-Ministru, Taur Matan Ruak tenke buka dalan hodi solusiona estrutura Governu ne’e.
‘’Impaktu mós ba dezenvolvimentu nasionál, tanba ne’e mak Parlamentu ejize nafatin ba ita-nia Primeiru-Ministru ho Prezidente Repúblika hodi kompleta estrutura Oitavu Governu nian’’, nia subliña
Jornalista: Evaristo Soares Martins
Editór: Xisto Freitas
