DILI, 09 setembru 2019 (TATOLI) – Xefe Departamentu Sinál no Tráfiku Diresaun Nasionál no Terrestre (DNTT) Ministériu Transporte no Komunikasaun (MTK), João Eugénio da Silva, hatete sei monta sirene iha semáforu atu fasilita maluk sidadaun portadór defisiénsia sira.
Objetivu atu monta sirene ne’e nu’udar símbolu ida oinsá maka bele fasilita maluk sira defisiénsia matan bainhira sira la’o ka sa’e karreta karik sirene ne’e bele fó sinál ba sira katak sira to’o ona iha fatin ida ne’e.
“Ita-nia maluk ema ho defisiénsia sira mai enkontru dala barak ona ho ami hodi ko’alia kona-ba karik iha futuru DNTT planeia bele monta sirene (alat pemeritahuan) ba semáforu sira, aléinde ne’e iha fatin sira seluk, nune’e sira la’o ka sa’e karreta karik bele iha ona sinál sei tun iha fatin ne’e”, João afirma ba Tatoli iha Balidi, ohin.
DNTT rasik sei fó atensaun másima hodi diskute ida ne’e ba iha orsamentu tinan oin nian atu MTK bele toma atensaun nune’e DNTT bele halo ona imediata bainhira osan iha ona.
“Ami sei halo gravasaun lian ba iha área ka fatin sira iha Dili laran hanesan tau iha semáforu (lampu merah) no ba iha fatin sira seluk kuandu ita-nia maluk ema ho defisiénsia sira kuandu sa’e karreta taxi ka mikrolete bele hatene ona sira nian diresaun tun iha ne’ebé tanba sinál sirene rasik fó hatene”, dehan João Eugenio.
Aléinde ne’e monta iha semáforu, ba futuru DNTT sei hanoin sei monta ba karreta sira liuliu taxi no bis kota sira karik aban bain rua iha, nune’e maluk defisiénsia sira bele hatene ona diresaun ne’ebé sira bá.
Tanba iha Konstituisaun artigu 21 kona-ba sidadaun ema ho defisiénsia mós iha direitu ba moris tanba ne’e maka DNTT sei la husik sira iha kotuk mesak.
Artigu ne’e ki’alia katak 1. Sidadaun ne’ebé iha defisiénsia fíziku eh mentál iha direitu no mós obrigasaun hanesan sidadaun sira seluk, maibé sira sei la hala’o knaar hirak ne’ebé sira labele hala’o tanba de’it sira-nia defisiénsia. 2. Estadu, wainhira bele, promove protesaun ba sidadaun sira-ne’ebé iha defisiénsia, tuir lei haruka. Artigu
João Eugénio afirma sistema sirene ne’ebé sei monta iha semáforu sira no ba iha fatin taxi no bis kota sira ne’e mós tuir ekipa DNTT nian estudu komparativu ne’ebé halo ona iha Singapura no nasaun avansadu sira seluk mós implementa ona, tanba ne’e iha futuru Timor-Leste liuhusi DNTT sei planeia hodi implementa, Maibé atu atinje depende ba iha Orsamentu Jerál Estadu ne’ebé Governu aloka ba.
Jornalista : Natalino Costa
Editora : Maria Auxiliadora
