DILI, 10 setembru 2019 (TATOLI)-Diretór Nasionál Orsamentu Estadu Ministériu Finansa, Salomão Yoaquim, hatete Komité Revizaun Orsamentu Polítika (KROP) sei diskute kle’an iha parte tékniku ninian ba proposta adisionál sira ne’ebé mosu hosi ministériu no instituisaun sira.
Nune’e, evita alokasaun dobru ba orsamentu, maibé proposta adisionál balu iha mós konsiderasaun direta.
“Kona-ba kestaun proposta adisionál hetan konsiderasaun ou la hetan konsiderasaun klaru katak iha, maibé maioria tenke submete liuhosi diskusaun ho grupu tékniku atu haree didi’ak ninia porsaun sira ne’e, nune’e deside karik ho kualidade orsamentu hodi evita iha duplikasaun aloka orsamentu”, afirma Diretór Salomão ba Tatoli hafoin reuniaun KROP) iha Ministériu Finansa, Aitarak-Laran, ohin
Salomão dehan, la’ós maioria proposta adisionál la konsidera, proposta balu ho montante konsidera direta hanesan iha área saúde ninian ne’ebé mak KROP foti desizaun direta.
“Área saúde ne’ebé maka sensitivu no konsidera direta hanesan iha Ospitál Nasionál Guido Valadares no seluk maka tenke submete ba diskusaun téknika hanesan laboratóriu nasionál aumenta porsentu 0.01”, Salomão relata.
Relasiona ba proposta adisionál hosi Sekretáriu Estadu Asuntu Kombatente no Libertasaun Nasionál nian, Diretór Nasionál Orsamentu Estadu ne’e dehan proposta ne’e submete ba iha Fundu Infraestrutura tanba refleta duni.
Salomão salienta : “Ha’u la lembra proposta adisionál ohin loron nian, maibé ha’u bele dehan iha, más barak liu halai ba FDCH, no Fundu Infraestrutura (FI), sira aprezenta fali mai ne’e hodi fó hanoin hela de’it nune’e labele haluha, maibé sira-nia programa ne’e balu aloka ona iha FDCH no balu iha FI”.
Jornalista : Antónia Gusmão
Editora : Maria Auxiliadora
