DILI, 10 setembru 2019 (TATOLI) – Ministru Justisa, Manuel Cárceres da Costa, iha loron 16 setembru ne’e, sei dezloka ba Portugál atu estabelese akordu kooperasaun ho Universidade Coimbra, hodi fasilita formasaun espesializada ba juis, prokuradór no defensór públiku timoroan.
Notísia Relevante : MJ Sei Oferese Bolsu Estudu ba Timoroan Na’in 20
Atu bele asegura envolvimentu formasaun ba timoroan iha area espesializada ne’e, MJ mós hanoin ona atu halo rekrutamentu ba juis, prokuradór ho defensór públiku nain 45.
Ministru Manuel Cárceres esplika, mekanizmu rekrutamentu ba formandu ba juis, prokuradór no defensór públiku iha sentru judisiál la’ós ona hanesan uluk, katak kuandu la pasa ba vaga juis bele konkorre fali ba vaga prokuradór ka defensór públiku.
“Uluk too agora, se mak valor di’ak ba juis, se mak valor médiu ba prokuradór no se mak valor ki’ik ba defensór públiku,” esplika Ministru Manuel Cárceres da Costa, hodi responde Ajénsia TATOLI iha Ministériu Justisa, Caicoli, Dili, segunda (09/09/2019)
Iha polítika Oitavu Governu Konstitusionál liu husi Ministériu Justisa konsidera la di’ak tanba nee, ba formandu nain 45 ne’ebé mak hakarak hili juis, prokuradór no defensór públiku tenke hili kedas antes ba ezame finál no kuandu la pasa iha ezame konsidera la pasa ona no la ba tan ona entre tolu nee ida.
Nia hatutan, ba formandu nain 45 sei halo ezame admisaun pois mak sei haree ninia rezultadu, hafoin ba iha sentru formasaun jurídiku hodi aprende konseitu jerál direitu no justisa, kontinua iha universidade Coimbra tinan 4, estájiu hotu no halo ezame ikus mak determina.
Jornalista : Domingos Piedade Freitas
Editór : Francisco Simões
