DILI, 10 setembru 2019 (TATOLI) – Sekretáriu Estadu Formasaun Profisionál no Empregu (SEFOPE), Julião da Silva, hatete bá oin teste médiku ba kandidatu programa serbisu sazonál ka seasonal worker program (SWP) sei rigor liután, nune’e bele garante duni kandidatu sira nian saúde antes bá Australia.
“Ami sei asina tan akordu ho klínika privadu sira iha ne’ebé maka kualifikadu no mós ho ita nian Ospitál Nasionál Guido Valadares. Ida ne’e iha tiha ona ami-nia lista oinsá maka sira bele fasilita SEFOPE hodi hasa’e kualidade teste médiku nune’e bele fasilita ita nian traballadór sira bá Austrália di’ak liután,” governante ne’e dehan ba jornalista sira Kaikoli, ohin.
Tanba ne’e nu’udar meiu ida ne’ebé SEFOPE halo hodi prevene preokupasaun sira ne’ebé maka mosu iha públiku tanba saida maka kandidatu sira SWP nian bá Austrália, iha ne’ebá hetan moras tuberkuloze (TBC).
SEFOPE sei hadi’a iha parte ida ne’e liuhusi free health test no one day before test of health, fiar sei rigór hodi antesipa iha prosesu haruka traballadór sira bá.
Nune’e mós preokupasaun seluk katak traballadór timoroan iha Austrália grávida, Julião da Silva hatete kona-ba kazu ne’e médiku nian no susar atu kontrola.
Aléinde ne’e, problema seluk ne’ebé daudaun sai preokupasaun mak liga ba troka naran kandidatu SWP ba fali ema seluk, SEFOPE Julião da Silva hatete ida ne’e loos.
“Ita troka fali lista naran sira ne’ebé maka kandidatu traballadór Australia ne’e loos, maibé atu troka ne’e tenke haree fali kandidatu sira ne’ebé maka tama iha lista ita bolu ready full list ne’ebé prepara ona bá Austrália”, nia haktuir.
Tanba empreza iha Austrália hakarak imediatu presiza traballadór tenke to’o iha semana ne’e maka telefone ba kandidatu traballadór Austrália iha momentu ne’e nian telemovel fora entaun tenke troka fali kandidatu sira ne’ebé maka tama iha lista.
Iha fatin hanesan, Adidu Traballu Timor-Leste ba Austrália, António Armindo, rekoñese katak durante nian mandatu rejista mós kazu grávida no TBC.
“Kazu barak maka ami rejista hanesan traballadór balun ne’ebé grávida iha Austrália, ida ne’e kestaun médiku, nune’e mós moras sira seluk hanesan TBC, ha’u husu de’it bá oin SEFOPE tenke rigór iha teste médiku ba traballadór sira. Nune’e empreza labele dúvida ba ita nian traballadór nia saúde bainhira halo serbisu”, sujere Antonio Armindo.
Jornalista : Natalino Costa
Editora : Maria Auxiliadora
