DILI, 10 setembru 2019 (TATOLI) – Treinadór prinsipál Selesaun Nasionál ne’ebé antes ne’e nu’udar treinadór Boavista FC, Fabiano José Flora, hateten treinamentu la’o di’ak hela tanba jogadór sira koopera di’ak tebes ho treinadór.
“Agora komplikadu uituan, maibé di’ak hela tanba Liga Futeból Amadora seidauk hotu entaun jogadór barak sei foku hela ba liga ne’e. Liga ne’e sei ramata iha 29 setembru,” tenik Fabiano ba Agência Tatoli iha kampu Federasaun Futeból Timor-Leste (FFTL), Bairru Formosa, tersa ne’e.
Nia dehan, fasilidade ba treinamentu nian FFTL hato’o ona pedidu ba Sekretaria Estadu Juventude no Desportu (SEJD) atu hala’o treinamentu iha Estádiu Café Ermera nune’e bele fasilita treinamentu bele la’o di’ak liu.
“Ita tenta ona ba Sekretaria Estadu Juventude no Desportu atu utiliza kampu Ermera ba hala’o treinamentu nune’e bele hasa’e di’ak liután jogadór sira-nia prestasaun atu bele kompete iha jogu Sea Games ne’e,” dehan nia.
Haree ba tempu besik ona, treinadór ne’e informa, “Ita labele ezije de’it manán ka la manán, maibé ita tenke hala’o serbisu maka’as foin bele hetan rezultadu di’ak”.
Entretantu, tuir oráriu ne’ebé iha, jogu Sea Games sei hala’o iha novembru mai ne’e iha Manila-Filipina.
Totál jogadór ne’ebé hala’o dadauk hela treinamentu hamutuk tolu-nulu resin ne’ebé hili hosi klube ualu ne’ebé joga iha Liga Futeból Amadora (LFA).
Jornalista: Hortençio Sanchez
Editór: Xisto Freitas
