DILI, 11 setembru 2019 (TATOLI)-Ministru Negósiu Estranjeiru no Kooperasaun (MNEK), Dionísio da Costa Babo Soares, informa katak sei konsulta ho Primeiru-Ministru, Taur Matan Ruak kona-ba lista kandidatu embaixadór na’in 13 ne’ebé seidauk hetan pose husi Prezidente Repúblika, Francisco Guterres, Lú-Olo.
“Ida ne’e, ha’u sei konsulta lai ho Primeiru-Ministru depois sei hato’o ba iha Konsellu-Ministru, aprova fali mak foin haruka fila fali mai,” dehan Ministru Dionísio da Costa Babo Soares hodi hatán ba jornalista sira kona-ba lista embaixadór sira ne’ebé seidauk pose, hafoin ramata enkontru Konsellu-Ministru, iha Palásiu Governu, ohin.
Ministru Dionísio Babo Soares informa, sei hato’o fila fali iha enkontru Konsellu-Ministru tanba prezidente repúblika husu atu haree fali, ida ka rua. “Ne’ebé, ami sei mai haree, tenke konsulta fila fali para haree tanba ne’e ita reprezenta estadu. Ita-nia hanoin sira hanesan ne’e tetu hotu”.
Kona-ba problema prinsipál husi lista ne’e, diplomata timoroan ne’e hatán katak: “Ha’u labele ko’alia buat ne’ebé ha’u labele ko’alia,” hateten Ministru Dionísio Babo Soares.
Notísia relevante:PR Bolu Ministru Dionísio Hodi Ko’alia Kona-ba Lista Embaixadór Pendente
PM Taur Husu Ona MNEK Hadi’a Lista Embaixadór Pendente
Embaixadór Na’in Tolu Simu Pose Bazeia ba Koordenasaun PR-MNEK
Jornalista : Nelia Fernandes
Editór : Rafy Belo
