DILI, 11 setembru 2019 (TATOLI)-Relatóriu monitorizasaun husi Asosiasaun HAK, identifika komunidade iha Munisípiu Baucau, Aileu, Viqueque no Ermera seidauk asesu bee moos ho sufisiente.
Notísia Relevante: HAK Organiza Diskusaun ba Alvu Dezenvolvimentu Bee Moos ho Saneamentu
Diretór Asosiasaun HAK, Manuel Monteiro Fernandes, hateten, kobertura komunidade atu asesu bee moos dook husi sira ninia hela fatin. Nune’e mós bee matan sira ameasa maran iha tempu bai loron.
“Kestaun seluk ne’ebé ami identifika mak atitude komunidade nian ne’ebé la-kuidadu bee matan no la halo konservasaun entaun bee matan maran nune’e sistema ne’ebé mak montadu husi SAS la funsiona hotu,” informa Diretór HAK, Manuel Monteiro Fernandes, ba Ajénsia TATOLI, iha Faról, Tersa (10/09/2019).
Notísia Relevante : 2030, Konsumidór Bee Moos Atinje Porsentu 100
Estadu Demokrátiku Timor-Leste tenke garante sidadaun ninia diretu asesu bee moos no saneamentu ho di’ak tuir konstituisaun RDTL no konvensaun universál sira. Tanba ne’e, tuir Manuel Monteiro Fernandes, bee moos hanesan nesesidade báziku ne’ebé komunidade presiza atu konsumu hodi moris iha ambiente ida ijiene.
Nia esplika, daudaun ne’e HAK sei finaliza relatóriu ne’e hodi entrega ba Parlamentu Nasionál atu konsidera iha debate Orsamentu Jerál Estadu (OJE) 2020 hodi fó prioridade ba área bee moos.
Jornalista : Osória Marques
Editór : Francisco Simões
