Prezidente Tribunal Rekursu Konsidera Reasaun Xanana Motiva Justisa

DILI, 11 setembru 2019 (TATOLI) – Prezidente Tribunal Rekursu (PTR), Deolindo do Santos, konsidera, reasaun Komandante ein-Xefe FALINTIL, Kay Rala Xanana Gusmão, ba desizaun Tribunal nian kona-ba rai iha Tibar, Liquiça, hanesan korajen no motivasaun ida ba Tribunal atu servisu ho kuidadu.

Notísia Relevante : DNTP Liquiçá Laiha Koñesimentu Prezensa Kompañia Marino Enterprise

Prezidente partidu CNRT, Kay Rala Xanana Gusmão, nu’udar mós Negosiadór Prinsipál ba Delimitasaun Fronteira Marítima, tersa (10/09/2019), tuun direita ba Tibar hodi sobu lutu ne’ebé empreza Marino Enterprise halo tanba konsidera rai ne’e ninian no kazu disputa rai refere iha Tribunal nia mak manan. Tanba ne’e, kampaña konstrusaun Portu Tibar China Harbour Engineering (CHE) tenke hapara nia atividade esplorasaun fatuk rahun (batu kerikil) iha area refere.

Xanana ho ‘hirus’ hamutuk ho Polisia no akompaña mós  husi Ministru Justisa (MJ), Manuel Cárceres da Costa, tuun ba terrenu hodi sobu lutu sira ne’e no Xanana hola reasaun hodi husu ba Tribunal atu kaer nia no lori ba sela iha Prizaun Becora.

Notísia Relevante : Disputa Rai iha Tibar, Membru PN Apoiu Reasaun Xanana

“Deklarasaun maun boot Xanana halo nee, sei la hamate espíritu ha’u nu’udar Prezidente Tribunal Rekursu nian, juis no autór sira ne’ebé servisu iha area justisa atu labele servisu. Ida nee signifika katak korajen ida atu ita bele servisu ho kuidadu liu tan, e bele servisu ho di’ak liu tan ba futuru, ida nee maka ita tenke halo,” hateten Deolindo dos Santos ba Jornalista sira, ohin,  iha Edifísiu Tribunal Rekursu, Caicoli, Dili.

Deolindo esplika, la’ós Xanana dehan hanesan nee ona para servisu ona. Lae. servisu tenke lao ba oin nafatin tanba ko’alia kona-ba estadu, ida nee maka tenke haree.

“Maun boot sira hotu la’ós maun boot Xanana de’it, maibé sira hotu ne’ebé hari rai ida nee, tanba ita hotu tuir sira nia ain fatin de’it, sira hatene didi’ak oinsá maka bele dezenvolve país nee ba oin, oinsá maka bele apoiu sistema justisa bele lao di’ak liu tan,” Deolindo dos Santos esplika.

Tuir nia, importante maka sira rasik iha sira nia perspetiva oinsá justisa nee bele lori ba oin, nee maka presiza sira atu rona di’ak liu tan husi parte tékniku, bele kontribui informasaun ba sira, bele planu no jestaun atu lori justisa nee lao ba oin no lao di’ak liu tan.

Nia afirma tan, justisa atu di’ak nee labele dehan de’it prokuradór, defensór, advogadu ho juis sira, maibé parte hotu fó kontribuisaun atu lao di’ak ba futuru.

Jornalista : Domingos Piedade Freitas

Editór       : Francisco Simões