DILI, 11 setembru 2019 (TATOLI) – Prezidente Repúblika (PR), Francisco Guterres Lú Olo, kongratula Sarani Katólika Timor-Leste, ne’ebé hetan novidade foun liuhusi desizaun Papa Francisco, hodi representa Estadu Santa Sé ba Archedioceze Dili foun , iha 11 setembru tinan ne’e.
Nune’e mós, Xefe Estadu kongratula Bispu Dioseze Dili, Dom Virgílio do Carmo da Silva, ne’ebé hetan fiar hodi sai nu’udar Arcebispo Metropolitana dahuluk iha istória Kreda Timor-Leste nian.
Iha biban ne’e PR Lú Olo hateten, novidade ne’e hanesan k’solok boot ida ba sarani timoroan sira, iha ámbitu komemorasaun tinan 30 vizita Sao João Paulo II nian iha Timor Leste, iha outubru 1989.
Notísia Relevante: Vatikanu Foti Dioseze Dili Nu’udar Archidiocese no Don Virgílio Nu’udar Arcebispo
Xefe Estadu rekoñese katak, novidade ne’e lori no fó hanoin ba timoroan hotu katak nu’udar sarani, moris ho ninia identidade rasik nu’udar povu ida ne’ebé iha ninia dignidade rasik.
Nia subliña, novidade ne’e mós lori timoroan hotu atu halo reflesaun katak iha tempu difísil, São João Paulo II mai husik hela mensajen ida “Imi masin rai nian no Imi mak naroman mundu nian”.
Liafuan ne’e hanesan liafuan esperansa ba povu ne’ebé hasan hela todan boot ida durante tinan barak nia laran.
Tanba nee, Xefe Estadu promete sei serbisu hamutuk ho ulun bo’ot Igreja nian, liuliu Arcebispo Metropolitana no Bispu Dioseze Baucau, inklui Maliana atu tau matan ba povu, hodi lori povu ne’e ba moris hakmatek, dame, no dezemvolvimentu.
Jornalista: Cipriano Colo
Editór: Xisto Freitas
