DILI, 11 setembru 2019 (TATOLI) – Xefe Suku Mota Ulun, Postu Administrativu Bazartete, Munisípiu Liquiçá, Francisco Soares, la hatene prosesu fa’an no sosa rai entre kompañia Marino ho ema ne’ebé fa’an rai (Mário Abílio).
“Primeiru ema la konsidera ita, entaun problema ne’e ba oin ha’u la hatene, tuir loloos sira molok fa’an rai ne’e ita tenke husu ba malu. Ami mós aseita ho intervensaun maun Xanana nian, tanba parese buat ruma laloos’’, nia tenik ba Agência TATOLI, iha nia k’naar fatin, kuarta ne’e.
Notísia Relevante: DTP Liquiçá Laiha Koñesimentu Prezensa Kompañia Marino Enterprise
Nu’udar autoridade suku, Francisco Soares iha koñesementu ba prezensa kompañia China Harbour, la’ós Marino Enterprise.
“Ha’u laiha koñesimentu no lahatene kompañia Marino Enterprise mai sosa rai iha Kaitehu, ami hatene mak kompañia China Harbour tanba sira fó koñesimentu molok sira tama iha ne’e’’, nia dehan.
Nia haktuir, xefe aldeia Mota Ikun mós laiha koñesimentu ba prosesu fa’an no sosa rai entre kompañia Marino ho Mário Abílio.
“Rai ne’e uluk sira halo to’os iha ne’ebá. Avo Nana fó duni osan $15.000 mai ha’u no ha’u entrega ba rai-na’in, hafoin rai-na’in entrega kompañia Marino Enterprise, maibé kompañia Marino la simu, razaun la simu, ha’u lahatene’’, nia informa.
Xefe Suku ne’e realsa, hafoin kompañia Marino Enterprise lakohi simu osan ne’e, mak entrega fila fali ba Xanana Gusmão iha fulan hirak liubá.
Autoridade suku ne’e mós la hatene prosesu kazu rai ne’e to’o Tribunál.
Diretór Terra Propriedade Munisípiu Liquiçá, Tito Serrão da Silva, informa kompadór rai iha área Kaitehu mak Edencio Felisberto Soares, enkuantu Mário Abílio nu’udar rai-na’in (vendedór).
“Iha akta ne’e, kompradór entrega osan ho montante $15.000 nu’udar valór ne’ebé ekivalente ba rai ne’ebé maka fa’an’’, katak.
Jornalista: Evaristo Soares Martins
Editór: Xisto Freitas
