DILI, 12 setembru 2019 (TATOLI)-Diresaun Nasional Terras no Propriedade (DNTP) hein hela levantamentu dadus husi Sistema Nasionál Kadastru (SNC-sigla portugés) molok atribui sertifikadu kona-ba na’in ba rai iha territóriu Timor-Leste.
Diretór DNTP, Francisco R. Borges, iha nia servisu fatin, Bebora, Dili, ohin, rekoñese katak, oras nee disputa rai entre estadu ho populasaun inklui mós kompañia balun halo reklamasaun ba propriedade hanesan rai estadu, rai privadu no abandonadu kontinua rejista aas iha tempu ukun aan.
Nia hatutan, populasaun balun halo reklamasaun oi-oin kona ba rai hodi hatudu katak rai ne’ebé mak sira hela ba sira nian, balun fali okupa rai estadu sein iha koñesimentu husi estadu laliu husi rejistu iha autoridade lokál, balun fali rai sira nian, maibé ba buat hirak nee, DNTP la’ós lakohi halo atribuisaun no tuir prosedúr.
“Ha’u hanoin DNTP la’ós lakohi halo atribuisaun sertifikadu legal husi estadu, maibé sei hein hela levantamentu dadus husi SNC iha 12 munisípiu inklui Rejiaun Administrativu Espesiál Oe-Cusse Ambeno (RAEOA). Kuandu halo ona identifikasaun loloos mak sei halo atribuisaun sertifikadu ba rai,” hateten Francisco R. Borges.
Nia hatutan, oras nee daudaun diresaun nasionál de lejizlasaun Ministériu Justisa kona ba lei númeru 13/2017 rejime espesiál ba definisaun no diresaun husi gabinete diresaun jerál terras no propriedade halo hela sosializasaun oi-oin iha rai laran hodi identifika rai estadu, rai abandonadu no rai privadu.
“Ha’u hanoin antes atu atribuisaun sertifikadu rai nain ba rai sira, maibé buat hot-hotu hein desizaun husi Ministru Justisa,” nia afirma.
Nia hatutan, foin daudauk diresaun nasionál rua nee liu husi maun boot Kay rala Xanana Gusmão atribui ona sertifikadu rejistu ba rai iha Metinaro hamutuk uma kain 335 no hela uma kain 35 mak seidauk atribui.
Jornalista : Domingos Piedade Freitas
Editór : Francisco Simões
